相睇20次血淚史

我:「以前有冇去其他Speed Dating呀?」

Ken:「冇呀,第一次,不過相睇就超過20次。」

我:「20次?」

眼前嘅阿Ken雖然唔係俊男,但亦絕對唔算醜樣,起碼五官端正,斯斯文文夠主動,正路嚟講就算冇拖拍,都唔會相睇20次都冇著落,同埋……相睇呢個詞語有啲老土。

Ken:「真係相睇20次,因為全部都由親戚介紹,佢哋老一輩通常叫相睇。」

甩咗拖3年,而家35歲,Ken其實唔趕拍拖,不過屋企人好心急,加上佢嘅性格係「順得人」,長輩做咁多事前功夫介紹,佢都會禮貌應酬一下,加上持開放態度,如果見到適合嘅人亦願意放開懷抱。

綜合呢20次相睇經驗,佢話結果不外乎3個:

A)佢對人有好感,人哋對佢冇feel;
B)人哋對佢有好感,佢對人冇feel;
C)大家都冇好感,大家都冇feel。

佢姑姐早排話有個同事個女想介紹,Ken見到姑姐提咗幾次,所以就答應「溝通下」,同女方交換number講咗幾句,然後約出嚟見面。

Ken表示呢個女仔係33歲,冇咩唔好,只係過份被動,出到嚟全程都係阿Ken講嘢,如果佢一靜落嚟就會dead air,當然每個人都有自己性格,內向唔係個女仔嘅錯,只係阿Ken覺得當日相處咗兩個鐘,呢種溝通方式好攰,所以默認為唔適合。

你揀人,人揀你,個女仔當晚快一步,率先msg阿Ken表示:「我覺得我哋唔係咁啱。」

Ken好似驚我唔信,隊咗部電話埋嚟show之前啲msg,佢reply:「係,我都覺得大家唔適合。」

以為件事就咁完?隔咗3日,期間大家冇傾計,但係嗰個女仔再msg阿Ken:「我阿爸阿媽想見你,可唔可以上嚟食餐飯?」

Ken一頭霧水:「我哋唔係講咗覺得對方唔適合咩?做咩要同你阿爸阿媽食飯?」

女方:「係呀,不過佢哋想見下你。」

Ken雖然好苦惱,但係個女仔嘅阿媽即係姑姐個同事,睇在姑姐份上,唔想長輩難做,佢真係「幫忙」應約。

上到人哋屋企,世伯伯母好鍾意佢,睇得出女方屋企人仲心急,畢竟係上一代人,佢哋覺得個女已經33歲,再搵唔到男朋友拍拖結婚,好大機會孤獨終老。

捱完餐飯,諗住告一段落,嗰個女仔亦都冇再搵佢,點知又隔咗兩個星期,阿Ken再收到女方msg:「阿爸阿媽叫你上嚟食團年飯呀,年三十你ok?」當時就到新年。

阿Ken:「食咩團年飯?我哋一早講咗唔適合對方喇喎!」

女方:「係呀。」連求人都可以得兩隻字,msg都會dead air。

阿Ken:「小姐,你都對我冇興趣啦,上次去完你屋企,我msg話多謝你餐飯,你完全冇覆,emoji都冇一個,呢段時間冇傾過一句計,大家又有共識唔可以發展,你仲叫我上嚟食團年飯。」

女方read完個msg之後又冇覆,跟住電話到,唔係女方打嚟,係姑姐打嚟:「阿Ken,做咩唔上去食飯呀?」

Ken將成件事講一次畀姑姐聽,點估到姑姐話:「感情可以培養㗎嘛,人哋媽咪好鍾意你呀,話你係好男仔,一定會係好女婿。」

Ken今次叻仔冇心軟,然後又有另一個電話打嚟,呢次係個女仔嘅媽媽……

伯母:「唔好意思呀,我問你姑姐拎咗你電話,上嚟食團年飯啦,世伯都好想見到你呀,我哋好鍾意你㗎,你兩個係咪鬧交呀!」

Ken:「冇閙交呀,其實我哋唔係情侶。」

伯母:「吓,阿女話同你拍緊拖喎!」

阿Ken唔知咩事,只係覺得好尷尬,匆匆打個圓場:「伯母,我都好鍾意你哋呀,保重身體喇,就快新年,我提早祝你同世伯身體健康。」

Ken即刻msg個女仔問咩事?點解會同世伯伯母講拍緊拖?個女仔只係輕輕答咗句:「父母想,佢哋又鍾意你,你真係唔上嚟食團年飯?」

Ken覺得個女仔嘅處事方式好唔掂,唔知點解又覺得佢有啲可憐,但真係溝通唔到,跟住就冇再答個女仔,唔想糾纏落去。

我:「全部都係親戚介紹,又要畀面出席,唔怪得你話相睇咗20次啦!」

Ken:「係,呢個就係我嚟Speed Dating畀錢你賺嘅原因。」

error: