「嘩！而家咩年代呀？仲有人買鹹碟㗎咩？上網大把免費啦！使咩入呢啲舖頭揀碟啫，行出嚟撞到熟人咪水洗都唔清？你睇下，真係阿叔嚟㗎喎，我估佢哋唔識得download，唔係使乜畀錢人賺吖。」
同老婆行經一個舊式商場嘅時候，佢對住一間鹹碟舖指手劃腳，我除咗叫佢細聲啲之外，仲同佢講：「如果我話畀你知，以前我曾經喺呢啲鹹碟舖返過工，你信唔信？」我老婆答：「痴線，梗係唔信啦，喺度返工有咩做呀？收錢呀？」
佢唔信都冇辦法，不過我真係曾經喺鹹碟舖返過工，仲返咗四個月，數返轉頭都十幾年前喇，嗰陣中五畢業就冇讀上去，因為我老豆意外過身，屋企得返我同阿媽，成個生活變晒，人又冇晒方向，收捨情緒得嚟仲要諗生計。
我老豆冇買保險，佢走咗唔止令屋企失去經濟支柱，更加淨落一啲債要我同阿媽幫手還，嗰啲係親戚朋友債，唔係話拎住張死亡證就可以同人講唔還。
我阿媽好快就搵到份洗碗工，反而我拎住中五學歷低不成高不就，見咗幾份文職都唔請。
嗰陣時又傍偟又頹，特別係見幾份工都唔請嘅時候，信心真係會跌到落谷底，好似呢個社會唔需要我咁，後來喺屋企附近一個商場見到間鹹碟舖貼咗張紙出門口請人，佢寫得好好睇㗎，話請店務員，咁咪行入去問請咗人未囉！
幾錢人工已經唔記得喇，淨係記得即日現金出糧，行到入去就見到條MK，完全唔使見工，過程可以快到咁……
MK：「做過未？」
我：「未。」
MK：「而家即刻開工得唔得？」
我：「得，不過要做啲乜？」
MK：「你見到邊啲碟冇晒咪上返啲碟囉，啲客問嘢就答佢哋，錢唔使你收，你淨係幫佢哋裝落個黑色袋，計數，然後門口個老童會收錢㗎喇，你唔使掂啲錢，記得唔好親手收啲客錢呀，一陣有人放蛇拉咗你，我哋老闆唔負責㗎！」
嗰陣細個咩都唔識，我真係以為坐門口個阿叔叫「老童」，我以為係佢個名，點知老童原來係解道友。
個老童日日瞌眼瞓，要大大聲講銀碼先會醒一醒，後尾知佢人工係特別高，好似500蚊一日，佢嘅值錢位係拉人就拉佢，我同MK都唔需要上身。
首先，做呢份工我真係好驚畀人見到，因為個商場唔係距離我住緊條屋邨好遠，步程約莫15分鐘左右，我小學中學都喺呢個屋邨嘅學校讀，你想唔想像到我喺呢頭附近有幾多朋友同埋舊同學？
咁驚又要做？冇錢吖嘛！窮吖嘛！工又搵唔到，唔通睇住阿媽一個人捱咩，啲親戚走嚟追老豆舊帳係追得好凶狠㗎！
不過條MK最初講工作範圍就講啲唔講啲，原來我仲有一個職責……
MK：「喂，我有事要出去，你一陣入晒啲封面佢。」
我：「哦……我可唔可以搬張枱入舖頭整呀？」
MK：「梗係唔得啦！舖頭有幾大呀？你唔好阻住啲客揀碟呀，出門口張枱入啦！快手啲呀！」
佢哋嘅運作模式係自己燒碟，另外再color print個封面出嚟，然後舖頭有好多透明碟套，每日有人將一箱箱碟送去舖頭，跟住我就要套入去再入埋封面，我每次入碟都好驚撞到熟人，個老童又幫唔到手。
好好彩，我喺門口入碟係從未撞過熟人，不過喺舖入面招呼緊客嘅時候就撞過，仲要係中學阿Sir，佢驚過我。
我：「林Sir，買碟呀？」
本身已經好閃縮嘅林Sir見到我之後更加驚，但佢仲識得反問我：「點解你會喺度㗎？」
我：「返工囉！」
林Sir：「你喺度做？我經過入嚟睇下咋。」
我：「但係你手上面拎住兩隻碟喎，100蚊5隻，你揀多3隻先啦！」
林Sir：「我睇下㗎咋，唔係買。」佢真係好驚，即刻將手上兩隻碟放低就走咗，唉！你為人師表，買鹹碟去遠啲啦！雖然嗰陣已經係7點鐘過晒放學時間，佢應該係OT完，不過呢度附近仲有好多你嘅學生㗎！
可能佢係我阿Sir，所以佢擺低嗰兩隻碟我到而家都仲記得，一隻係明日花，一隻係吉沢明歩，好大路，不過兩隻都係飾演女教師為主題，明白嘅，嗰陣學校有個別miss都幾靚，總好過佢買啲學生主題嘅AV，點講都好啦，買碟行遠啲吖嘛！
後來我做咗幾個月真係頹到不得了，匿喺舖頭不見天日，每星期得一日假，同事就係得老童一個，另外有幾個MK耐唔耐都會落舖，但通常巡個圈就走，所以我就邊做邊搵工，一搵到份文職就走喇，辭職又唔使一個月通知。
我：「老婆，我真係做過鹹碟舖㗎！」
老婆：「信你先奇！」
細細個好在意，完全唔想畀身邊嘅人知道，我阿媽都唔知，佢一直以為我做普通售貨員之類，大個我就反而睇化咗，都係一個經歷嚟啫，咁當然冇特登同人講啦，唯一一個坦白嘅人就係老婆，點知佢唔信，咁咪算囉！