早幾日見咗份工，萬零蚊CS，當然唔係咩dream job，只係咩都去見下咁囉。上到間公司，HR安排我入間房填form，當時已經有個女仔坐咗喺度填緊，雖然佢戴住口罩，不過睇對眼都覺得係靚女，斷估除咗罩唔會差得去邊啩！
HR除咗畀張form我之外，仲有一頁問題要填，其實都係啲好廢同常見嘅question，只係佢用英文去問，應該expect我用英文答，包括”Tell Me About a Challenge or Conflict You’ve Faced at Work, and How You Dealt With It.” “Tell Me About a Time You Made a Mistake.” “What Type of Work Environment Do You Prefer?” 我諗大家去見工都遇過，例牌菜幾碟。
HR離開間房之後，我同另外嗰位女求職者各有各填，期間見到佢喺個袋拎支水出嚟飲，換言之要拉低口罩，我扮不經意擔天望地瞄到一眼，果然冇令我失望，真係靚女一名，點估到佢忽然同我講嘢：「Hello，我叫Linda，你都係見CS？」
我：「係呀。」
「你叫咩名？」
我：「我叫Cliff。」
「咁我哋係咪爭緊同一個位，哈哈！」
我：「應該唔係啦，佢個ad話請多名，即係唔止一個位。」
「咁又係，你識唔識答啲問題？」
我：「還可以啦！呢啲問題成日見，都係答啲行貨嘢。」
「可唔可以教我答呀？」
我：「教？咁我又唔識點教，都係靠吹咋，一係你參考下吖！」
「可以咩？好呀！」
我都知道咁樣做好奇怪，不過想講出一個事實，就係眼前呢條女，絕對吸引過我見緊呢份工，萬零蚊CS我好容易搵返，但係靚女唔係時時可以食到，Sorry，係識到。
靚女一路參考答案一路填表嘅時候，輪到我問返佢嘢喇。
我：「你之前做開CS？」
「唔係呀，我做Sales，但佢話唔使相關經驗吖嘛，所以就試一試囉！」
我：「咁你住邊區呀？」
「我住沙田，所以呢份工都算近我屋企。」
我：「我又係喎，我住禾輋嗰頭。」
「我住第一城，好近咋喎！」
我：「如果請晒我同你就好喇。」
「我都想呀！」
新相識難免傾埋啲廢嘢，不過最重要都係搵到話題，而歡樂嘅時光真係過得特別快，冇幾耐HR就入嚟收返啲form同份問題紙，我哋仲講笑咁話，招聘廣告雖然寫住「多名」，都唔代表上嚟見工一定請㗎嘛，可能每日有好多人上嚟interview，正當我想鼓起勇氣問靚女拎電話嘅時候，HR又開門入嚟。
HR：「經理睇完，佢話你哋互相抄答案，所以佢覺得唔適合，或者你哋可以返去先。」
我：「冇喎，我哋冇抄答案。」嘗試抗辯嗰陣心情好複雜，首先我真係冇抄，係靚女抄我，技術上係冤枉，但又冇理由篤灰，更何況我的確借畀靚女睇，其實畀人參考點計都唔啱，所以無奈地都要爭取下。
HR：「全部答案一模一樣，我諗唔好拗喇。」
靚女全程面露尷尬冇出聲，唉，唔通美貌同智慧永遠唔可以兼備？我頭先掛住撩你傾計冇理咁多啫，你都唔使一字不漏全部copy吖，改少少字眼都得啩！
結果我哋一齊離開間公司，仲諗住有機會做同事，點知大家連interview嘅機會都冇，不過唔緊要啦，蠢蠢地嘅靚女先至最可愛，一早講咗呢份萬零蚊嘅工遠遠唔及眼前呢位Linda咁吸引，最衰部電梯有其他人阻Q住晒，好啦！一落樓即刻問佢攞電話！
「頭先唔好意思呀，累埋你。」
我：「唔緊要，我都唔係好鍾意呢份工之嘛，係呢，你食咗lunch未呀？一齊吖！」
「食咗喇。」
都唔緊要，你抄我答案，我抄返你牌，係時候問電話號碼……
「走先喇，我男朋友等緊我。」
只見有個高高大大嘅男人行埋嚟，Linda配合地上前拖住佢，仲不忘回頭向我Say Goodbye，唔好意思個結尾好爛，但真實中就係咁爛，我好似個傻仔咁望住佢兩個嘅背影漸行漸遠，然後不斷同自己講：「唔緊要，份CS萬零蚊之嘛，我都唔係好想做……萬零蚊啫萬零蚊啫……就算有得in都未必請啦……」