畀人話似蜥蜴仔之後，阿健首先將自己嘅profile picture轉咗做風景相，再剷走晒Facebook裡面所有見樣嘅相，跟住以一敵百對抗網民：「一定要好靚仔先可以批評人唔靚仔呀？我有話自己好靚仔咩？成班打手收晒錢做嘢！」
其實阿健上網同人鬧交來來去去都係得幾招，1）粗口；2）侮辱性說話；3）唔夠人講就會話你係五毛同打手。但正所謂先撩者賤，唔係要好靚仔先可以批評人唔靚仔，問題係你先作出批評，咁就應該預咗人哋批評返你。正所謂雙拳難敵四手，阿健最終力戰而敗，佢delete咗自己嘅留言落荒而逃。
不過經此一役，阿健並冇收斂，反而因為成個Facebook account冇晒真樣所以肆無忌憚，每日都上網屌呢個屌嗰個，現實生活依然係一個廢人，喺網上世界就愈嚟愈凶狠，基本上你數得出嘅藝人同KOL都畀佢攻擊過，就算係政府谷針嗰類新聞post，阿健都要走去攞下彩：「我就準備好唔入商場，唔入餐廳，唔睇戲，唔搭巴士㗎喇。」
有同事見到呢個留言就問佢：「我記得你好似打齊三針㗎喎！」
阿健：「我冇話自己冇打針呀，不過我唔會屈服於打針先可以入商場餐廳戲院之嘛！」
冇錯，佢句留言並冇講到自己打針未，但方向明顯係想人哋覺得佢好型好硬淨，結果如阿健所願，呢個comment有幾廿個like，原來存在感就係咁樣刷返嚟。
唔止對外，就算係對身邊嘅人一樣係負能量爆燈，話說有位舊同事同人夾份開咗間食肆，廣邀我哋like下佢個餐廳page，仲叫我哋輪住去試食，完全免費，其實舊同事又好，朋友又好，展開事業新一章當然替對方高興啦，偏偏阿健就唱反調。
阿健：「執硬啦！呢個市道開舖，見到啲相都知唔好食，好普通咋喎啲嘢，我喺屋企都煮到啦！」
間餐廳做唔做得住係一回事，但係點解相識嘅人開舖，冇打氣同祝福說話不特止，仲要睇死一定執笠呢？睇到人仆街就踩多腳，見到人成功就唔抵得，典型嘅憎人富貴厭人貧。
反社會人格有幾項特徵，包括為人唔可靠、唔誠實、唔會感到羞恥、缺乏判斷能力，而且極度自我中心，以上幾點阿健都中晒，工作方面已經睇得好清楚，所以當時同期入嚟呢間公司嘅人大部分都升晒職，甚至跳槽有更好出路，不過阿健依然原地踏步，仲寸我哋係港豬，好鍾意做嘢。
其實一個人對工作有熱誠，唔代表佢係豬，一個人努力做嘢嘅目的未必係咁單一要取悅老細，因為每個人都有自己嘅Reputation，建立到Reputation，之後講嘢先會有人信，咁先至會有人脈，假設你認識阿健，佢吹雞話要開舖，你會唔會願意投資？
我自己都窮過，好明白呢種心態，就係「反正我乜都冇，最好全世界一齊閪冧」，如果一個人夠成熟，應該會知道身邊嘅人唔掂，其實自己都唔會好得去邊，好困難嘅時候發現周圍嘅人仲衰過你，想搵幫手都叫天不應。
相反地，身邊嘅人過得好，唔止自己開心，你會發覺機會同埋可能性都大咗，舉個例，有個朋友早幾年去咗間唔錯嘅公司，近日佢問我有冇興趣過檔，條件都唔錯，我慎重考慮緊，咁你想身邊嘅人好，定係想佢哋個個撈唔掂，仲調返轉頭問你借錢？
別人不斷努力嘅時候，阿健就將人生大部分時間用嚟上網就Hater，有時仲會好犯駁，例如佢曾經share過ViuTV劇集《IT狗》裡面嘅金句：「點解你哋成日都想搞隔籬個平台呢？就算人哋死咗，都唔代表你哋會變好。」呢句說話講得好好，亦為阿健嘅網上留言讚到十幾個like，不過佢真係明白當中嘅意思咩？阿健每日做嘢一樣甩甩漏漏，但就永遠唔會錯過任何一個喺網上取笑人、鬧人、批評人，或者幸災樂禍嘅機會。
喺阿健眼中，所有人都係垃圾，而其實喺所有人眼中，阿健先至係垃圾，當然，佢嘅世界係自我感覺良好，甚至覺得自己懷才不遇，孤芳自賞，曲高和寡。
阿健係我真實中嘅同事，但「阿健」亦都係一種社會現象，「我想你好，但唔可以好過我囉」，問題係阿健呢一種人，要過得比佢好實在太容易喇。 (完）
《垃圾》上
同事網上好凶狠 現實生活係廢人
https://hkofficedaily.com/?p=21398