《我份糧唔包打假波》2018年4月27日刊出
你份人工包咗咩？包勞力？包時間？包受氣？有冇試過包埋投票嘅意向同權利？我以前做過一間公司，老闆都算係娛樂大亨，某日全公司每人獲派一張投票表格，投咩？原來係一個廣告獎項，其中一個提名單位係我老闆旗下嘅藝人。
Admin姐姐逐個位逐個人派，佢唔係腳骨力好得滯呀，係上頭落咗柯打，要提醒啲員工一定要投嗰位老闆旗下藝人，Admin姐姐痴線到企喺每個人隔離篤住你剔，睇住你簽名，嘩！使唔使呀，廣告獎咋喎，選特首呀？不過咁，特首直情唔使篤住你投，因為都冇得投。
平心而論，唔分邊個老闆，我本身係好欣賞嗰位藝人，其質你唔篤住，我係會投佢嘅，但搞到要受監控之下「被投票」，咁我就唔投喇，我份糧真係唔包投票嘅自由，你要因為咁而炒我都冇辦法。
最後並冇因為我堅持唔投而變成拉鋸局面，因為我上司費事煩，私自拎咗張投票表格，求其劃咗隻龜，剔埋嗰位藝人交畀Admin，我仲要之後先知，咁點呀？為咗個濕雞廣告獎辭職呀？呢啲咁小嘅事都要全公司總動員造馬，真係冇嘢好講，更何況都係分豬肉啫，奉上一疊疊嘅「被投票表格」，點都唔及奉上一疊疊嘅鈔票，有啲嘢在心中啦！
我早前將呢單嘢同一位朋友分享，佢嗤之以鼻，淡淡然丟低一句：「廣告獎咋？我公司每個同事都「被簽名」支持撐警，點計先？」我完敗，諗真啲我舊公司都唔係好衰啫，早知當年唔為難Admin姐姐啦！
=
👉 重溫其他蘋果日報專欄