《出高昂佣金請人的原因》2018年4月6日刊出
之前喺某個facebook植入式廣告中提及到，點解啲客會願意畀佣金，用我哋headhunt去請人，除咗密謀炒員工，唔想畀自己公司嘅同事見到招聘廣告之外，以下兩個原因亦好常見。
一、空缺多，請唔切
呢種情況通常發生喺大公司，例如啲Call Centre，工作環境閒閒哋一百幾廿人，流失率又高，HR請人速度追唔上員工辭職嘅速度，有時呢頭請咗，嗰頭又有另一個辭職，HR有三頭六臂都唔掂。
另外我亦見過一間傳媒每個月有200個空缺，員工流失率高之餘，佢內部又不斷新增職位，但負責請人嘅HR得3個，老細仲落埋order要一個月內請晒，咁你計下喇，一個星期返5日工，一個月20日，即係每日要請5個人，咁唔係個個上嚟都請，有啲又要second in，班HR晚晚OT到10點仲係請唔切，所以就要搵外援，亦即係各大獵頭公司。正因為咁，有啲求職者會喺短時間內收到唔同headhunt嘅電話，但都係咁啱叫佢去見同一份工。
二、向競爭對手挖角
同行如敵國，呢種情況喺銀行業界最常見，A銀行如果明目張膽撬B銀行嘅人，隨時會搞到六國大封相，畀你成功撬到就冇所謂，最弊可能神女有心，個求職者無夢，到時人哋唔肯過檔仲周圍唱A銀行挖角，咁就真係樣衰喇，所以搵Agency做醜人係最安全。
不過同類情況亦喺某間知名時裝品牌出現過，嗰次個客開晒名叫我撬一個人，連人哋公司電話都畀埋我，咁咪即係送錢畀我？我問個客：「你自己都有晒料啦，做咩自己唔打啫，多錢得滯呀？」
個HR答我：「你打啦！錢我哋有，老細點名要佢㗎。」
再睇下啲資料，哦！明白晒！原來係競爭對手啲人，呢招高吖，增強自己實力之餘，又可以削弱對手戰鬥力，咁你餵到埋嚟我嘴邊，唔通我唔食咩？
=
👉 重溫其他蘋果日報專欄