《份工重要，定係原則重要？》2018年4月20日刊出
舊同事去咗某機構做HR，當年我哋思想好接近，一齊鬧老細刻薄，一齊不恥公司制度，佢轉工我好支持，更加免費幫佢搵人，因為佢新老細係唔會畀錢用獵頭公司，偏偏要搵嘅人又好獨特，齋出廣告根本請唔到。
朋友叫到，邊計得咁多？呢啲係友情，亦係義氣，而我第一個幫佢搵嘅職位，就係佢嘅assistant，我記得自己同個求職者講，呢位係我朋友嚟㗎，好好人，放心做啦！
之後嘅日子，我朋友仲叫我幫手搵其他職位，咁我就開始奇怪喇，好地地一間50人嘅公司，因乜事每個月都有10幾人集體辭職？個比例其實好誇張，亦反映咗有問題存在，我向朋友了解，原來係老細成日鬧員工，仲要係人身攻擊嗰種，但我朋友話啲員工唔聽話，做嘢求其，又唔怪得晒老細。
雖然佢係我朋友，但做人唔可以聽one side story，我解決唔到佢公司問題，唯一可以做嘅係停止介紹人去做，始終是非黑白分唔清，如果真係伏，就無謂害咗其他人。
三個月過後，我第一個亦係唯一一個介紹畀我朋友嘅求職者搵我，話頂唔順要辭職，老細鬧佢係豬、冇用、點解阿媽生得佢咁蠢，我聽完火都嚟，如果換轉當時人係我，一定打咗個老細九年。
其實呢單嘢令到我好心痛，我親手介紹求職者入去做，原來令佢受咗咁多委屈，若然間公司係街外客我冇嘢好講，係自己朋友公司先至最接受唔到，今次我錯喇，會引以為鑑。
最嬲係我同朋友因為呢件事而嘈，我朋友竟然話老細係咁都冇辦法，當年同仇敵愾嘅人，而家因為份工改變晒立場，除咗失望，真係唔知講乜。
搵食我理解，但即使係搵食，錯與對，黑與白係唔會改變，我朋友已經變成當年佢自己最憎嗰類人，所以我哋亦都唔再係朋友，又調返轉講，如果呢個人認為老細向員工人身攻擊都冇問題，大家價值觀差距咁大，仲值得做朋友咩？
=
👉 重溫其他蘋果日報專欄