每年中秋、聖誕、冬至、除夕，仲有農曆新年，例牌會收到舊老細send嚟嘅長輩圖，內容來來去去都係嗰啲啦，今年冬至亦唔例外，幅圖係有幾粒湯丸，大大隻字寫住冬至快樂身體健康，真係行貨到一個點。
Send節日長輩圖過嚟嘅又唔止佢一個，但話晒都係舊老細，佢真係帶我出身，教識我好多嘢，總之冇佢就唔會有今日嘅我，所以幾行貨都好，我一定打返幾句祝福說話回覆，順便問候下佢近況如何。
舊老細從來唔會reply我嘅msg同埋問題，好似完全ignore咗一樣，但係下個節日又識得自動波再send啲長輩圖過嚟，十足十嗰啲AI人工智能咁，真係畀佢激死，我掃返前幾個msg，原來中秋節嗰次直頭約佢食飯都唔覆，當時我係咁樣打：
「Sam哥，中秋節快樂呀，你嘅祝福我收到晒，最近你公司點呀？生意好唔好？我有個客想整啲模板，如果ok都會訂幾大量㗎，直接畀你contact佢好唔好？你睇下邊日得閒出嚟食飯吖，我叫埋班手足出嚟。」
由於舊老細完全冇覆我，結果就冇咗件事，我再碌返前啲，其實2022個農曆新年都約過佢，當時收到佢嘅賀年長輩圖之後，我又係打咗一大揪msg回佢：
「Sam哥，恭喜發財，身體健康，Mic少同阿華早排都有提起你喎，佢哋話好耐冇上你屋企拜年，阿嫂點呀？如果你得閒又唔嫌我哋嘈，大家上去你度聚一聚啦，起碼6,7年冇見喇，出嚟飲茶都得㗎！」
見返呢個msg，發現舊老細都係冇回我。
Mic少同阿華都係舊同事，一樣跟過呢位舊老細搵食，原來佢哋都會定時定候收到舊老細嘅祝福長輩圖，Mic少亦有問過可唔可以上去拜年，結果同樣得唔到回覆，我哋3個亦有私下講笑：「喂，搞咩呀？成個機械人咁嘅，問佢嘢又唔覆。」
阿華：「可能費事應酬我哋呀！」
Mic少：「咪係，我哋走咗之後，佢又請過其他人啦，得鬼閒同我哋食飯咩，係都同而家啲伙計食啦！」
我：「咁又係，人哋話教識徒弟冇師傅，而家係師傅唔想理我哋班徒弟。」
不過今年有少少唔同，因為Mic少定咗2023年3月全家人過澳洲，如果走之前唔見一見面，下次要齊人都唔知等到幾時，難得嚟緊個農曆新年又咁早，一月份就到喇，所以我真係好想幾師徒把握機會聚埋食餐飯，提早成個月前約定差唔多啦！
因為呢個舊老細不嬲好玩得，所以除夕又收到佢嘅長輩圖之後，我打算將Mic少就嚟過澳洲嘅事話畀佢聽，只係諗諗下佢可能完全唔睇，最終我改變主意，決定親自打去同佢單聲，嗱！咪鬼再hea我呀！
電話通咗，我未等佢打招呼已經講：「喂！Sam哥！點呀你？唔好咁行貨係咁send長輩圖過嚟喎，食個飯啦，Mic少就嚟去澳洲喇，你身體點呀？」
另一邊廂傳嚟嘅係一把女人聲：「佢身體麻麻呀，你係阿榮呀？」
當時我仲未意識到，所以keep住笑笑口嘅語氣：「你係阿嫂？好耐冇見喇，你咁叻認得我係阿榮。」
阿嫂：「有來電顯示㗎嘛，你點呀？幾好嘛？」
我：「我幾好呀，老細咩事呀？中招呀？冇事嘅，傷風感冒嚟啫，之前我都中過啦！」
阿嫂：「唔係，佢中風呀，講嘢有啲辛苦，怕你聽唔清楚佢講乜，另外身體都有啲毛病，行動唔係好方便。」
我一時都唔識得反應，好後悔頭先嘅輕挑態度：「咁樣呀……唔嚴重吖嘛？」
因為我識得同埋比較熟嘅人裡面，真係未接觸過中風嘅case（當然平時聽人講係聽得多），所以我完全唔知道中風係咪會痊癒同埋點樣醫治，加上又未了解舊老細仲有咩身體毛病，當時我好驚講乜都係唔恰當。
阿嫂：「不如視像通話吖，你可以同佢打個招呼，佢喺我側邊之嘛！」
後來轉換成視像通話，我見到舊老細明顯面癱，成個人好虛弱，講嘢要用好大嘅氣力先可以完成一句句子，嗰陣時突然諗返以前共事嘅畫面同零碎片段，兩行眼淚忍唔住流咗落嚟，因為太突然喇，幾年前仲好地地，點解會發生咁嘅事㗎？
個腦好混亂，見到舊老細念念有詞講咗句說話，但係我聽唔到，男人老狗即刻擦走啲眼淚先，我估佢係安慰返我轉頭，我唔想佢咁辛苦仲要走嚟安慰我呀！
反而阿嫂好樂觀咁同我講：「佢冇事㗎，唔使擔心呀！」
我：「哦……」唔知應該講咩，亦唔知點回應。
阿嫂：「佢係都要叫我過時過節send嗰啲圖畀朋友，我都話好老土㗎啦！」
我：「唔老土呀，好warm㗎！」
阿嫂：「不過都好多人會覆返佢，佢唔可以逐個慢慢睇，我又唔知點同佢覆。」
我：「唔緊要呀，知道你哋近況ok就得喇。」
我對住電話個鏡頭係咁同舊老細打招呼，唔等農曆新年喇，即刻約Mic少同阿華下星期上去舊老細屋企坐，我哋想畀啲支持佢，2023年真係冇咩特別願望，最緊要係身邊嘅人健康同平安。