幾個月前某一日，正當我熄晒電腦準備走嘅時候，老闆打內線叫我入房傾兩句，以為講公事，點知係聽佢訴苦，我份糧唔包做社工㗎喎！
老闆好直接，基本上冇開場白，一嚟就講到自己好慘好慘，首先提到呢兩年疫情令生意大不如前，又話公司有好多街數未收到，佢私人仲向銀行借咗啲類似中小企貸款，個個月要撲水還loan，近幾個月都係問朋友借錢先出到糧畀我哋。
我：「哦！」唔係冷血呀，但你想我點應你呀？
老闆：「我噚晚擔心到瞓唔著。」
我：「咁嚴重？但係啲單好似照常入呀，又唔覺生意跌咗好多，工作量都冇減過。」
老闆：「減咗好多！啲單細咗好多㗎！呢一兩年得個做字，僅僅夠交租同燈油火蠟咋，我自己都冇錢落袋。」
我：「其實公司有冇事㗎？」想點啫？講重點啦！
老闆：「話唔埋呀，最近周圍搵人入股，你都喺度做咗幾年啦，有冇興趣吖？」
我：「有冇興趣咩呀？入股？我冇打算做生意呀，同埋入咗股又有好多股權問題，我都唔識，唔係講緊一千幾百喎，邊有錢投資吖。」痴線，講入股，拍緊《創世紀》咩？收購埋公司好唔好？
老闆：「係㗎，如果入股就唔係一千幾百，唉，我而家都為下個月出糧頭痕，如果你哋驚公司唔掂，想另外搵工我絕對明白。」
因為冇預期老闆會講呢啲嘢，一時之間都唔識點答，只係做咗咁多年人，多少聽得出佢語帶相關，暗示員工快啲搵定後路係咪？都講得好明顯啦！
我梗係冇走啦，但開始發覺陸陸續續有人辭職，10月中嘅時候有四個同事自己遞信，咁就比較奇怪，因為公司近年冇乜人流失，可能個個都知道市道麻麻唔想走住，所以忽然有四個人差唔多時間離職係好罕見。
後來多咗同事討論，我哋私下傾嘅時候先至發現好多人都畀老闆叫過入房，聽到嘅說話大同小異，大部分都好似我咁聽完就算，原來HR曾經收過指令要每組交一至兩個人出嚟配合裁員，問題係老闆唔想賠任何錢，希望主管可以氹到啲人自動離職，HR覺得唔可行，最終擱置交人頭計劃，點知老闆選擇自己出招，使唔使搞咁多嘢呀？
睇返勞工法例，僱員按連續性合約受僱不少於24個月，因裁員而遭解僱就可享有遣散費，之前遞信嗰幾位同事裡面，最短年資嗰個3年，有一個仲做咗7年，唔怪得老闆想人自動辭職啦，呢度真係慳唔少。
你話我自私又好，賴皮又好，就算老闆全程用哭腔訴苦，其實我都冇諗過辭職，唔係因為忠心，而係佢同我講呢番說話嘅時候已經9月底，同年尾有咩分別？如果你炒我就不如賠錢，人不為己天誅地滅，作為打工仔咁樣諗都好正常啫。
你要開飯，我都要開飯，何況我有做嘢㗎嘛！啱唔啱先？當然啦，而家知道咗老闆個心點諗，我更加唔會走住，有咩過埋農曆新年再算啦！