記得《辦公室日報》好耐之前有篇文講過，英文名太深太難讀，可能會令到一啲想搵你見工嘅人卻步，過往我搵工嘅時候的確遇到呢個問題，明明background好適合，in完唔請我明白吖，但係send 幾廿份CV都冇回音就真係唔合理，仲試過有位headhunt提議我改英文名，後來我精呀，加返個中文全名落去CV度，情況明顯改善，起碼搵到而家呢份工先吖。
我英文名叫Joaquin，in呢份工嘅時候，HR同部門經理不約而同問我點讀，唔理咁多喇，請咗我就神仙，咁你知公司email、信件聯絡嗰part，仲有卡片始終要落英文名㗎嘛，所以獲聘後我照用Joaquin，並非有心留難，只係中學已經用緊呢個名，連身份證都有用，唔通走去改咩！
好多人問完Joaquin點讀之後就好自然唔記得，做咗差唔多一年，部門經理都仲係叫我「阿邊個」，有次老細走埋嚟想交低啲工作，佢望一望我，好想嗌嘅同時，個樣又好似頭痛咁，結果就畀咗個file我側邊位同事。
呢種情況唔係第一次㗎喇，老細係咁，經理係咁，同事又係咁，就連客都係咁，無數次幫客跟嘢，send個email出去，對方叫唔返我個名，打嚟求其有人聽就搵嗰個人follow，永遠唔會指定要我跟，好在我唔係做Sales唔使跑數。
其實有同事試過嗌我㗎，不過佢哋唔係叫「Jo-Queen」就係叫「Jo-Q」，有個仲過份，叫我Joan，點應你呀？女仔名嚟㗎喎！講真個名唔算好難讀，但我又唔係高層，只係普通散仔一名，相信大家亦唔想花時間研究我個名。
全公司得一個女同事讀得正，佢話自己好鍾意睇Joker《小丑》，仲係男主角Joaquin Phoenix嘅fans，冇錯呀，奧斯卡影帝Joaquin Phoenix接受訪問時就提及過曾經改名叫Leaf，原因係身邊嘅人硬係讀錯Joaquin，所以細細個嘅時候好困擾同唔開心。
我係球迷，有個西班牙球員叫Joaquin，講波佬硬譯「祖亞昆」，其實就唔啱音嘅，反而有啲網譯做「華甘」就近似啲，但係同事又點會想知個典故吖，話唔定個個喺背後講：「妖，好人好姐改個咁嘅名，鬼識讀咩！屎忽鬼！」
唔識讀咪好囉！我喺公司咁冇存在感，係咪好空虛好寂寞好凍？啱啱相反，自問性格唔算進取，呢份工對我嚟講都只係跳板嚟啫，雖然暫時冇轉工念頭，但肯定唔會做過世，同埋其他人為咗避開讀個名而唔搵我，日常工作真係少好多麻煩，不知幾爽。
頭先經理喺後面好似想叫我做嘢，佢係咁：「呀…呀…」明明隻手係指住我，又「呀」極都「呀」唔出，勇敢啲啦！講出來！
跟住就見到經理隻手指調整方向，指咗去我側邊個同事：「Billy，你幫我問Sales係咪答應咗個客19號前有sample吖。」
Sorry阿Billy，又麻煩到你。