老闆列五大辭職徵兆 請半日假嘅員工最可疑

公司早排走咗兩個人,其實有同事辭職係好平常嘅事,點知老闆突然小題大做,叫晒HR同埋啲經理開會,佢話留意到兩樣嘢喎!

老闆話:「Simon走之前,我見過佢喺pantry傾私人電話,見到我嗰陣仲有啲閃縮,結果冇幾耐就辭職喇,另外我又見到Albert斟水係用紙杯,即係佢冇私人杯啦!有冇人話我知佢係執走咗定係一直用紙杯?而家Albert都遞埋信。」

我哋成班喺會議室啞口無言,唔係覺得佢有道理,而係喺pantry講私人電話有幾咁閒呀?我老公都唔會打我枱頭電話,次次都係打手提,行咗入pantry傾好出奇咩?何況傾傾下見到老闆,避忌係正常反應啦!至於紙杯,可能真係懶洗杯呢,點樣check住每個同事係咪用私家杯呢?

更驚訝嘅係,老闆竟然一早print定張紙畀我哋,標題係《同事辭職5大徵兆》,真係睇到笑,嗰5大徵兆如下:

1)無端端請假,特別係請半日假;
2)離開個位聽手提電話,甚至行出office講電話;
3)張枱冇私人嘢,特別係杯都冇,用公司杯或水機紙杯;
4)催促公司claim錢;
5)推搪跟進新project。

我當時心諗,老闆,我中晒喎!咁而家應該點呀?炒我呀?

無端端請假,特別係請半日假,當然有可能係見工,但更多時候係有啲嘢做,又唔想浪費全日假啫!至於催公司claim錢,呢個好笑,會計claim得慢咪追囉,有啲錢幫公司出住先已經仁至義盡啦,唔通我同會計講:「唔使急㗎,得閒先claim啦!」你話係咪忽根?同埋唔肯跟新project就更加搞笑,正常打工仔都唔想follow咁多嘢啦,唔通搶住要跟晒啲project咩!

所謂嘅5大徵兆,當然有少少搵工辭職嘅味道,但係以我嘅經驗,真係會走嘅同事,可以一樣徵兆都唔中,突然就同你講resign,所以邊個想辭職其實係冇路捉,反而邊個唔會辭職我仲答到你,就係當個同事日日話準備resign,日日話搵緊工,呢啲就通常做一世嘅。

有個經理都忍唔住問:「咁知道又點呀?」

老闆:「知道咪留意下囉!」你同冇答有咩分別呀?人哋問知道又點,你就叫人留意下,咁留意下又點呢?

其實當你留意到員工有呢啲徵兆嘅時候,一切已經太遲,辭職不外乎幾個原因,人工待遇、晉升機會、公司前景,或者係公司氣氛,總而言之就係心灰意冷。

你留意到個員工想走係冇意思,不如檢討吓點解留唔住人才仲實際,醒下啦老闆!

投稿讀者:Belinda

error: