我星期六日同埋假期會去一間Cafe做兼職侍應，已經持續咗四個月，本來都冇乜煩惱， Cafe工作亦唔算好辛苦，但係之前偏偏撞到我正職公司一個女同事，佢有日同班friend嚟食嘢。
佢見到我嘅時候好突然，我亦唯有禮貌地向佢打招呼，雖然有啲尷尬，但當時冇諗太多嘢，跟住星期一返到公司就發現全部同事知道晒，仲畀上司捉咗入房「照肺」。
其實所謂嘅「照肺」，上司唔係鬧我去做兼職，佢主要係話公司有合約條款寫住唔可以做任何形式嘅part-time或者秘撈，如果有就要申報，所以佢斟酌我嘅point係冇申報。
講講下又有個HR入嚟，佢話本身隻眼開隻眼閉，但嗰個見到我嘅女同事好似有心搞大件事，走去篤灰叫人事部跟進。使唔使咁呀？其實我同嗰位女同事喺工作上完全冇交接，都冇得罪過佢，雖然秘撈係我唔啱，不過唔明點解個女同事要周圍同人講，仲要走去人事部打小報告。
Cafe份工嘅時薪係60蚊，當HR、我，仲有上司三個人閂埋房門傾嘅時候，我真係有諗過會冇咗份正職，估唔到上司會幫我解畫，佢話公司唔畀同事秘撈，應該係針對我哋出賣資料，損害公司利益，而家我唔係幫競爭對手工作，返cafe做侍應完全唔關事，照計唔構成違反合約。
HR個樣就相對嚴肅，佢話呢啲係合約一早訂定，有啲老闆唔想員工另外有工作而影響精神同體力，如果份合約一早有呢個條款，就唔關係唔係相同行業嘅事。
講到咁以為公事公辦啦，點知HR自己話：「嘥氣啦！公司都有同事搞online store賣飾物賣衫，呢啲你捉佢唔到，講真邊管到咁多呀！」
上司又加把口：「如果老闆肯加多啲人工，同事咪唔使兼職囉！」
HR：「鬼唔知你阿媽係女人咩！」
佢兩個講講下竟然講到同事要兼職，某程度上係公司份糧太少嘅緣故，我就坐喺度唔敢畀意見。
最後HR話：「唔好理啦，而家揚咗冇辦法，申報咗先，老闆問起我哋再解釋囉，份兼職唔涉及公司業務，唔會炒嘅，不過可能會勸你唔好返，有心理準備先。」
申報完最後冇事，老闆托HR同我講，如果第二日要返工，前一晚盡量唔好返，因為佢想同事精精神神返嚟office，嚇死我，而家總算冇事，仲可以光明正大返Cafe，唔知嗰個篤灰嘅女同事會唔會好失望呢？
我知好多投稿都係講谷氣嘢，不過今次真係想讚下HR同上司企喺我個角度去諗，有頭髮邊個想做癩痢吖，份糧係夠，我都寧願放假出去玩啦，唔通由細到大嘅志願係去Cafe做兼職咩，同埋我覺得好多人都會做兼職，但有啲秘撈唔使出去見人，例如搞online store、寫嘢剪片、私人補習教琴……等等，收入未必穩定，有時申報唔到咁多，如果你份兼職係需要「拋頭露面」，例如有機會畀同事或者老細喺街撞到，咁就要考慮申報咗先，有啲公司唔係咁通情達理，隨時拎住份合約揸正嚟做，到時要拗就好無癮。