老屎忽見老闆娘鍾意Mirror 轉口風話欣賞姜濤

唔係想挑起任何舌戰,更加唔係要吹捧自己嘅偶像,純粹想講下公司一個老屎忽點樣阿諛奉承,原來一個人為求喺公司生存真係可以變臉變得好快。

利申我係Mirror Fans,但從未因為應援而喺返工嘅日子請假,完全冇影響到工作,我只係擺咗好多同Mirror有關嘅物品喺張枱,另外貼咗啲海報喺自己個位,仲要係Partition裡面對住自己,完全冇騷擾到任何同事。

不過唔知點解公司有個老屎忽咁都睇唔過眼,成日行埋嚟我個位冷嘲熱諷,講得最多嘅幾句真係已經識背。

「而家啲明星咁嘅?鬼五馬六,同以前比真係差得遠。」

「一個二個油頭粉面,都唔知邊個打邊個,我哋嗰代啲明星歌星好有性格㗎!」

「其實你鍾意佢哋啲咩啫?呢啲咁嘅樣一個招牌跌落嚟砸死幾個啦!」

「好心你唔好貼出嚟啦,好低檔次呀!」

「嗰日去到尖沙咀海傍成班圍埋咁影,真係不知所謂,你哋知唔知自己做緊乜㗎!」

「嗱!佢哋一定係畀錢搵人扮fans,懶係做到次次出現都好墟冚,我話你聽吖,咁樣即係燒錢㗎咋,你請職業fans請得幾耐?」

得啦!最叻係你啦好未呀,不過最火滾係佢叫我搣晒啲海報同收埋Mirror啲嘢,講咗好多次,我終於忍唔住發火:「其實關你咩事呢?其他同事都貼唔同海報,我隔籬個同事成枱都係模型,仲買個架返嚟擺,前面個同事大大張電影海報,你同佢哋講吖嘛!」

老屎忽:「點同啫,嗰啲我識吖嘛,而家我淨係識嗰個姜濤,其他嗰啲唔知乜頭乜路。」

「你唔使識㗎,你識尊重人就夠㗎喇,我哋有個人自由,你顧掂自己啲嘢先啦!」

老屎忽:「阿女,你都幾冇禮貌,所以話咩偶像就吸咩人。」

「唔好叫我阿女,同埋我對你已經好有禮貌,你講咗咁多次,我都係今次先同你嘈。」

好戲在後頭,某日老闆娘去搵我阿頭(平時佢好少行埋嚟),見到我個位就突然大聲講:「咦!你鍾意Mirror咩?」

我都未答,個老屎忽已經喺隔籬兩行衝埋嚟加把嘴:「係囉!都唔知鍾意啲乜!」

點知老闆娘話:「咩唔知鍾意啲咩呀?我個女好鍾意㗎,搞到我都跟住佢睇,而家自己鍾意埋一份。」

我即刻過老屎忽一戙先啦:「係咩?好嘢嚟㗎!不過張生話Mirror鬼五馬六喎,又話咩偶像就吸咩人。」

我見張生面色都變埋,未嚟得切解釋已經畀老闆娘窒佢:「咁你即係話埋我啫!」

張生:「我唔係咁嘅意思,見佢貼咗好多海報出嚟啫,我都好欣賞嗰個姜濤㗎!之前暈咗吖嘛,我有留意。」

與此同時,張生指住我幅海報,佢指住Edan話自己欣賞姜濤,我梗係不留情面咁恥笑佢啦!

老闆娘:「呢個唔係姜濤喎,你識唔識㗎?」

張生以笑遮醜,彈開啦老屎忽!

自從老闆娘表明自己同個女都係Mirror fans之後,張生就冇好似以前咁走嚟我個位冷嘲熱諷,簡單嚟講就係「收晒皮」。

我想講嘅唔係心唔心涼之類嘅問題,係一個人原來為咗喺職場生存可以咁現實,其實鍾意邊個係其次,你有你自由,我有我自由,所以做人又好,做同事又好,唔該學識尊重,你唔欣賞好小意思,但唔好為踩而踩。

香港多幾個呢啲老屎忽就真係玩完。

投稿讀者:Kelsey

error: