我喺某傳媒做嘢，基本上每個星期都會有客戶或者PR送嘢過嚟，有啲係試飲試食試用，有啲就咁慣性當sample，你氹吓我我氹吓你嗰種。
唔係做呢行嘅人可能會問，PR無啦啦做咩送product畀我哋？喺呢度解釋吓先，PR好多時搵我哋出新聞稿都係冇報酬冇錢，簡單嚟講即係拍膊頭，基於呢個世界冇free lunch嘅全球通行定律，冇sample邊有人上心幫你宣傳吖！所以做我哋呢行嘅人都慣咗收product㗎喇。
咁通常有咩禮物呢？小至餅乾、樽裝飲品、盒裝飲品、戲飛、coupon，大至衫褲鞋襪同埋智能電子用品乜都有，我所講嘅大小唔係件物品嘅體積，而係佢嘅價值。
負責體育用品嘅PR出手幾豪㗎！季尾試過送紅白藍袋過嚟，裡面我諗有50件波衫啦，通常都係上季嘅，另外送波鞋都冇手軟，好多款式出面都賣緊過千蚊一對，另外見過有同事收到十幾對女裝鞋，護膚品亦唔少，但係最氹得班編輯開心嘅始終係電子智能產品，最近就有同事收到隻智能運動手錶，出面賣緊接近$3,000，佢一個屈尾十放上拍賣網站就執咗二千幾。
個同事仲話：「我有付出㗎，要出席個客嘅活動影相，山長水遠天氣又熱，最後仲幫個客出咗兩、三個post呀，算係咁啦！」
要知道呢位同事平時係跟開電影，突然踩過界連gadget呢瓣都咁上心，證明隻錶係幾咁吸引！
初初嚟做覺得唔習慣，始終個客呢頭送嚟，嗰頭你就擺上拍賣網舉咗佢，好揚啫！但係大家都已經唔理喇，有個同事仲話：「正，今個月自製雙糧！」
「咁多？」
同事：「呢兩個月收到好多月餅券吖嘛，另外有隻錶，有幾件波衫同T恤，仲有對波鞋。」
係喎，未計佢哋一年一度嘅月餅券。
阿頭唔會鬧唔會理唔會check？Sorry呀！阿頭自己都賣緊sample，其他同事都係拎佢手指罅流出嚟嘅嘢去搵食咋。
不過話說回頭，賣下sample就個個月出bonus甚至雙糧，有冇咁好賺呀？講到尾咪又係因為份人工太少囉，記者編輯呢一行呢，待遇就出名低賤㗎喇……加薪少，福利少，千祈唔好同唔係做呢行啲friend比較添呀，聽到出面啲人嘅月薪，真係會覺得好慚愧。
所以同事之間嘅名句就係：「人工咁低，賺啲零用錢唔過份吖！」
我啱啱轉咗行，雖然成日有「禮物」收係好爽，不過我都係追求人工同埋發展前景，長遠嚟講點都好過打份工再走去撈埋拍賣，今次離職，公司都唔請人代我個位，由得人手自然流失，即係我啲同事又會辛苦咗，不過唔緊要啦，少過香爐少隻鬼，之後佢哋又會有多啲sample可以賣，少個人爭，當幫補下囉！
投稿讀者：泰格