早幾日見咗個Candidate，咁我in完覺得ok，就即刻安排佢見埋department head，我雖然係HR啫，但都係打工仔一名，我都去過interview，可以嘅話咪一日內搞晒做埋second in囉，好過要對方短期內請兩次假或者分兩次上嚟吖嘛！
不過我哋公司個女經理就特別麻煩，佢次次都叫埋我一齊sit in一齊見，我好多嘢做㗎，你自己in完覺得可以請，咁咪講聲畀我知，等我幫你善後囉，但呢樣並唔係重點，重點係呢位女經理出名奄尖腥悶，陪佢一齊in人真係特別尷尬。
女經理：「你而家做緊嘅公司好細咋喎，我哋呢度好大，人事關係好重要，點解你會有信心apply我哋呢？我喺度諗，你有冇能力同其他department嘅人溝通同合作？不如講下你點解想轉工先。」
Candidate：「我轉工正正係因為呢個原因，人望高處，我梗係想去大公司發展啦，同埋呢兩年喺細公司做嘢其實幫咗我好多，因為公司資源唔夠大機構好，所以樣樣親力親為，好似少林寺咁，下下要自己主動搵人傾嘢，變相學到好多，仲要同好多人溝通，之後無論去邊都唔怕難適應。」
我以HR嘅角度去聽，呢位Candidate嘅答案雖然未稱得上最標準，但其實已經答得好好，你質疑佢做唔掂大公司，佢就話畀你知因為做過細公司要一腳踢，所以咩都識，而且同幾多人溝通合作都冇問題，呢個answer冇100分都有90分啦！
話得呢個女經理特別麻煩梗係有原因嘅，人哋已經答到中晒point，女經理個樣仲keep住西口西面，唔知佢有咩唔滿意呢？不過慣㗎喇，呢個老女人一年365日都好似嚟緊M咁，難為班下屬要日日跟住佢做嘢。
女經理：「講開你喺而家間公司做咗兩年，我留意到你轉工好頻密喎，上一份3年，前一份2年，而家呢份又係做咗2年就搵工想走，你都好jumpy喎！」
Candidate：「我做過3份工，份份都最少2年，你咪仲多，總共做過8份，有一份做咗4個月，另外有一份做咗半年，另外有兩三份都係做得1年，我見你跳得仲密。」
當時我個腦一度load唔切，點解個Candidate會咁清楚女經理轉過幾多份工？每份做咗幾耐？我係HR有晒record都唔會記得啦！
女經理：「你點會知㗎？」噢！我心中嘅疑問，女經理幫我問咗出口喇。
Candidate：「我上嚟interview之前做過research，喺LinkedIn睇下呢個department嘅同事background，咁我知道你係department head，個profile又係public，我咪撳入去望下囉！」
女經理：「你做咩睇我LinkedIn個profile呀？」
Candidate：「咁你set咗公開吖嘛，去見工當然要了解下間公司同埋人嘅背景啦，講返轉工密個問題先，其實你轉工都好密，而且一間大過一間，你冇理由唔明白㗎！」
我坐喺側邊睇到好爽呀！不過我亦都知道個Candidate咁樣答法，呢份工一定凍過水。
女經理：「我LinkedIn個profile唔係畀你睇㗎喎！」
Candidate：「你而家LinkedIn個status係open to new opportunities，咁你可以set返做connect咗嘅人先至睇到。」
笑死，個Candidate除咗教返個女經理「如何正確使用LinkedIn」之餘，仲喺唔知有心定無意嘅情況下爆埋女經理open to new opportunities，呢次點落台吖！
女經理「啪」一聲將原本拎住嘅CV拍落張枱度，然後同我講咗句：「你見埋佢吖，我有嘢要做。」
有冇搞錯呀！咁薄皮㗎！人哋做過3份工（而家呢份仲要未正式辭職）你就話人Jumpy，你自己轉過8次工就唔可以畀人話轉得密，而家拍埋枱走人，留低啲手尾畀我呢個HR執。
女經理拂袖而去離開meeting room之後，我同Candidate講唔好意思，因為當時個氣氛真係好僵，房裡面嘅空氣簡直係靜止咗。
Candidate：「唔緊要，都唔關你事，佢自己轉咗8份工，仲好意思話我轉工密，然後個LinkdeIn任人睇，又嬲我走去睇，我都唔知佢想點，入嚟跟佢搵食都唔慌會有好日子過㗎喇，明嘅，你唔使叫我返去等消息，我知咩事㗎喇！」
呢個Candidate果然非池中物，好似看透世情咁，答問題又答得好（唔計寸女經理嗰個答案）、見工又會做足research、而家仲調返轉體諒我話唔關我事，HR department呢邊唔請人咋，否則我真係想請咗佢。
唔好意思呀呢位Candidate，我嘅身份唔方便兜口兜面讚你，喺度祝你盡快搵到理想新工作，呢個女經理同你一定火星撞地球，唔入嚟做都係好事嚟嘅。
後來個女經理又走嚟人事部搵我呻，好似想怪我叫咗個冇禮貌嘅求職者上嚟interview咁，關我鬼事咩，我同個求職者見工嘅時候不知幾愉快，係你自己攞嚟之嘛！
臨尾呢個女經理仲問我：「LinkedIn嗰度點樣set做私人呀，我唔想再畀人睇到自己啲履歷。」
妖！頭先人哋教你又唔聽書，麻Q煩！