新人返工，做極都開唔到單，覺得佢愈嚟愈頹，想睇下有咩幫到手。
Print咗佢份KPI出嚟一齊研究，發覺當中好多客都係吃力不討好：「A公司我入行初期做過，次次話好急搵人，次次Send完CV去都冇回音，可能想拎我哋啲求職者陪跑；B公司個HR好好，但個Line Manager出名衰格，應該要三頭六臂先請，唔好嘥時間；C公司請到都冇前途，因為好伏，大部份求職者返幾日至一星期就resign，通行都知，你要預咗搵replacement；D公司唔好做喇，條鬼婆好麻煩，有少少唔鍾意就打去Head Office投訴你，唔好以為外國月亮特別圓；E公司係就係會in我哋啲人，但我好耐之前畀過幾個求職者上去，個個返嚟都話in得好唔開心，對方好冇禮貌，你有冇試過？」
新人：「有呀！上星期介紹咗個求職者上去，見完好嬲話我嘥咗佢一日假。」
「其實F同G公司嘅position銀碼雖然細啲，但起碼solid，唔係搵你啲CV去墊底，你不如畀啲力招呼呢兩間啦。」
新人：「聽完鬆一口氣，起碼知道唔係自己搵嘅求職者有問題，係個客有問題，但又好唔開心，望返轉頭真係浪費咗好多時間，行咗好多冤枉路。」
「我唔係想打擊你，只係我受過嘅苦，希望之後嘅同事唔使再受。」
新人：「我知，多謝你講真相畀我聽，只係知道之後覺得好殘忍。」
我明，不過殘忍嘅唔係真相，最殘忍其實係人人都知道真相，又要粉飾太平。呢番說話唔止講headhunt啲job，有過相同經歷嘅人一定會知係咩感受。