今日有讀者留言問，究竟見完工幾耐冇feedback等於冇機會？兩星期係咪要死心？（我搵唔返個留言，唔記得exactly嘅字眼，希望呢位漂亮嘅讀者唔好介意）
其實好難一概而論，以下係我經歷過嘅case，一齊study下。
Case 1
因為有人辭職，阿客叫我請人，第一個星期進行咗1st interview，相隔一星期再做second in，佢又諗咗幾日，當時已經接近三個星期，然後佢打嚟叫我個求職者喺見完工第四個星期先返工，原因係上一任員工對公司好不滿，驚新人會聽到好多負面嘢，所以特登唔畀佢哋交接。
Case 2
我未做headhunt前嘅公司，又係上一任員工辭職後即刻登廣告請人，用咗個半星期去見唔同求職者，到決定時已經係第三個星期，打去叫個求職者再隔一星期先返工，新舊兩人只有兩至三日交接工作，原因你真係估佢唔到－－－－－－office冇多餘吉位，佢哋唔想新人成個月冇位坐，一日半日就無所謂。
Case 3
見完一星期左右已經請，叫佢即時返工，因為個position好緊要，驚交接唔到之後會好麻煩。（註：個role係要負責出糧，咁你明白有幾緊要啦😂）
另外，想講下有時隔好耐先決定請你，未必係你嘅問題，可能係合約問題。
我試過撬一個researcher，佢fresh grad之後入咗呢間公司做嘢，得半年經驗，人工我記得係12000，但你唔好睇佢咁junior，原來全公司任何職位嘅人resign都要兩個月通知，呢啲公司通常會嘆慢板見人同請人，所以你見完工等好耐就係咁解。
又有好多公司係分等級有唔同合約，舉個例，我有個做fashion嘅客，一般merchandiser辭職一個月通知走得，其餘manager grade全部要三個月通知，所以你見嘅職位愈senior，等嘅時間亦愈耐。
當然上述只係部分個案，我仲遇過見完即請，個僱主心急過求職者；又遇過隔一個月先請我個求職者，原來係之前佢自己請咗，不過條友做唔夠一個月就辭職，所以搵我啲人做後備替補；仲有一路話請，一路話好鍾意個求職者，最後突然冇晒聲氣。
總括而言，咩情況都有，一樣米既然養百樣人，當然就會有唔同性格嘅老細，唔同作風嘅公司，僱主係愛才的話，其實佢都驚你等得耐take咗其他offer，但若然最後都石沉大海，亦唔好懷疑自己，唔好失信心。
未必係你唔好，有時只係份工同你唔匹配。
共勉之！