都好多年前，呢幾日打風又諗起，而每次諗返起都猶有餘悸，因為嗰陣時係8號風球之後一日返工，做做下嘢突然有個男人上咗嚟公司，一入門口就大聲叫囂：「邊個係老細？躝出嚟啦柒頭！正一縮頭龜！」
我當時仲以為有人上嚟追數，個男人其實唔似收數佬或者古惑仔，普通恤衫牛仔褲，稱唔上斯文不過就冇江湖味，應該未到40歲。全公司啲同事呆晒等睇戲，點知第一個衝出去嘅唔係老細，反而係一個叫阿碧嘅女同事。
我同門口位置有一段距離，除咗個男人大嗌嗰下之外，好多細節都聽唔到，後來阿碧又向住個男人大嗌：「走啦！你走啦好冇呀？唔好喺度搞事呀！即刻走！」
之後佢哋嘅對話就開始清楚喇，因為個男人同阿碧嘅情緒都失晒控。
男人：「你梗係想我走啦！今日我唔打柒你個老細我唔姓鄭！你叫佢出嚟！做咩呀？夠膽做唔夠膽認呀？」
阿碧：「我叫你走呀！做乜要嚟我做嘢嘅地方搞事呀！」
其實有啲亂，office全部人都肯定有幾個疑團解唔開：
1）有人找老細晦氣，關阿碧咩事？幾時輪到阿碧沖出嚟擋？
2）個男人同阿碧咩關係？阿碧有男朋友㗎喎！佢男朋友咪喺呢間公司做囉！
3）阿碧原來又同老細有路㗎咩？幾時嘅事？老細會食呢啲中女？
呢個時候老細行出房問：「咩事咁嘈呀？」
有同事又真係答佢：「搵你喎！」
嗰陣時所有同事嘅情緒同思維都好複雜，一堆疑團未解開，但手頭上又冇花生，全人類放低晒手頭上嘅工作等睇戲，隔籬位個Sales本身同客傾緊電話，我聽到佢講咗句：「喂，原來老細同個女同事搞埋，睇戲先，一陣call返你！」
不過八卦嘅狀態好快就完結喇，因為個男人舉高咗隻手，有個紅色膠袋明顯係包住啤酒樽之類嘅物體：「搞人老婆咁過癮？我燒咗你公司！嚟吖！一鑊熟吖！死都搵埋你陪葬！」
大家真係知驚喇，男女同事全部大叫，有一句說話此起彼落：「有事慢慢講！」
真係驚㗎！個男人又唔知乜頭乜路，如果佢決心尋死，你點知佢會做唔出？同埋好多嘢都係一時衝動，佢嬲嬲地淋火水點火就玩完㗎喇，公司得一個門口，放火根本冇路走，一係跳窗，不過呢度係15樓。
老細：「邊個係你老婆？」
個男人指住阿碧：「楊X碧係我老婆，你唔使扮嘢啦仆街！」
我當時個心都係叫老細做仆街，你搞同事呀？呢度咁多後生女唔搞，你搞個中女？悶得滯呀？不過我又同時多咗個疑問~乜阿碧結咗婚㗎咩？冇派利是嘅？新婚呀？冇理由吖，阿碧明明同我哋公司另一條中坑同事Ivan拍拖㗎喎！人人都知佢哋係一對，日日孖公仔食lunch打情罵俏，公開咁滯㗎喎！你哋幾個究竟咩關係呀？
老細：「我冇搞你老婆！我都有老婆，我結咗婚㗎喎！」
男人：「仲結咗婚添！你真係仆街中嘅仆街，自己結咗婚都搞人老婆，睇下你老婆又幾時畀綠帽你戴！」
老細繼續冷靜：「不如你搞清楚先仲好啦！」
男人：「你冇搞我老婆會叫佢陪你出差？會叫佢陪你去澳門過夜？做嘢要過夜㗎咩！噚日8號風球你仲叫佢返工？返咩工呀？你叫佢返公司同你扑嘢呀！」
阿碧由頭到尾得一句對白㗎啫：「走啦！你走啦！唔好喺度搞事呀！」
老細：「我從來冇叫呢個女同事同我出差，噚日8號風球亦都冇叫佢返工，你最好問清楚佢，再唔走我就報警！」
我心裡面默默收返頭先鬧老細係仆街嘅說話，因為愈聽愈唔對路，首先老細真係冇可能食阿碧，其次係呢間公司唔使出差㗎喎，阿碧跟單出乜嘢差呀？拎啲單去澳門入呀？
阿碧：「走啦！你走啦！唔好喺度搞事呀！」x 10
老細個秘書好勇猛呀，佢喝出去同阿碧講：「阿碧姐，我叫你阿姐啦好冇呀？我唔知佢係咪你老公，但你同邊個一齊你自己好清楚，你帶個男人出去傾啦，唔好連累到其他同事，呢度好多人屋企有大有細。」
因為秘書突然神勇，其他同事個膽都大埋，一個二個話阿碧冇可能同老細有路：
「你點解話佢同老細有嘢先？」
「老細點會鍾意你老婆呀，你自己睇下合唔合邏輯。」
「先生，放火燒情夫唔緊要呀，但你放錯火搵錯人呀！」
「你兩公婆出去傾掂數先啦！」
我當時已經準備用手提電話撳999，個男人終於叫做平靜少少，阿碧亦成功將佢拉出去公司，仲搭埋電梯落樓，但係……老細之後仍然有報警。
阿碧後來一個人返嚟office，入房同老細傾完一大輪就拎袋走，可能為咗避嫌，老細叫多兩三個同事入房一齊聽，費事同阿碧孤男寡女共處一室啩！
嗰次係我最後一次見到阿碧，因為佢從此冇再返過嚟公司，老細即炒，聽講本身想放佢老公一馬，但警察方面唔畀，始終拎晒火水上嚟恐嚇放火，呢方面嘅細節就冇人同我哋呢班低級職員講喇，反而秘書有講點解阿碧老公會當老細係情夫。
成件事就係阿碧冇同任何人講自己結咗婚，但又同咗公司同事Ivan一齊，佢每次同Ivan出去都會借公司過橋，一係話老細要佢OT，仲試過話老細叫佢出差，最癲係喺電話度將Ivan個名改做老細，咁每次有電話打嚟或者Msg都會顯示「boss」，總之就咩都以公事去掩飾，夜返、冇返、星期六日唔見人、8號風球要返工，通通入老細數。
阿碧個老公後來起疑心，確認自己個老婆同「boss」有路，但又唔知道原來「boss」係另一個男同事，結果就出現呢次事件。
一路都冇介紹阿碧個男朋友Ivan，當人哋老公上嚟話要燒死晒我哋嘅時候，Ivan一直喺office現場，不過縮埋喺自己個位唔出聲。
大家當時冇篤Ivan出嚟係因為咁樣做好不智，加上事出突然又唔知道來龍去脈，直接講阿碧男朋友係另一位同事，個男人可能已經點咗火喇，所以對大家都冇好處。
其實阿碧被炒之後嘅第二日，Ivan自己都辭埋職，賠一個月人工提早走，究竟佢知唔知道阿碧本身有老公呢？到而家都仲係一個謎，因為兩位當事人已經走晒。不過呢單嘢喺我哋公司係經典事件，每逢打風就會有人提起。