投稿讀者：Kiffany
最近見成咗一份工，好感恩，感恩唔單單係終於搵到工作，而係我遇到一個好嘅HR，仲有一間好公司。
我本身都係做HR。
面試過程唔詳細講喇，重點係最後對方問：「你有冇咩問題想問返我？」
我：「唔好意思，有啲好奇，你冇問我點解失業咗兩年半嘅？」
其實咁問好唔得體，但因為我都係HR，對方見我有兩年半嘅真空期都冇質疑，甚至問都唔問，我覺得有啲奇怪，甚至有諗過：「係咪唔打算請我？」
估唔到佢答：「兩年半嘅真空期，你一定有自己嘅原因，但我要請嘅係一個適合我公司，同埋適合呢份工作嘅人，你過往嘅經驗同能力，仲有我對你嘅觀感，呢啲先至係最重要，我唔係要搵一個完美嘅candidate，我只係要搵一個適合呢份工嘅candidate。」
之前見過好多份工，基本上全部都質疑我點解有兩年半真空期，到我解釋係因為生小朋友，人哋又再質疑另一啲嘢，例如會唔會趕放工湊仔？會唔會因為小朋友而做做下唔做？曾經有個男HR仲問我：「生小朋友都係10月懷胎，就當你唞幾個月喇，比盡都係一年半真空期啫，咁最近一年呢？」
其實我唔止係一個新手媽媽，我仲係一個單親媽媽，過去一年不斷被質疑，加上市況唔好，職位根本唔多，所以搵工真係好難，財政負擔亦愈嚟愈重。
幸運地得到呢份工作，而家嘅生活壓力亦都冇咁大。
通常HR收到CV，scan完覺得你適合，就會再彈去畀department head，首先好慶幸呢位HRM（HR Manager）冇因為CV裡面嘅真空期而判我死刑，更好彩係我本身做HR，即係我份CV唔需要再彈去其他部門，否則過到HR呢關，都可能過唔到department head嗰關。
喺我個HRM身上學到兩樣嘢：
1）我哋唔需要十全十美嘅candidate，我哋係要揀一個適合公司同份工嘅candidate
2）Resume同CV幾亮麗都好，永遠唔可以反映一個人嘅全貌同能力。招聘，係要請一個適合嘅人，唔係請一份寫到靚一靚嘅履歷。