我老公幾年前中咗六合彩，當時我哋仲未結婚，好在佢冇唔要我😂
派彩有七位數，不過袋唔晒，因為登記完上去馬會收錢嗰陣，已經有幾個嚟自不同慈善機構嘅人喺度「恭候」，坦白講真係焗你捐錢，或者大家會問點解要捐啫？唔捐又唔會禁錮你，一蚊都唔捐又如何？我哋聽過人講，如果有咁大筆橫財而唔做返啲善事，好容易會冤枉嚟冤枉去，呢樣嘢寧可信其有，加上我老公又冇特別心儀邊啲慈善機構，所以就「係咁易」捐咗啲。
我哋當年第一件事就係去東歐旅行慶祝，返到香港就開始plan結婚，始終結婚呢啲嘢要搞好耐，嗰陣冇疫情，想搵間好嘅酒店擺酒再夾埋好日子，真係要大半年前走去book同埋準備。
中六合彩呢單嘢我哋冇同朋友或者同事講，得雙方家人知道，因為唔想有種炫耀嘅感覺，亦擔心有其他麻煩嘢出現，所以我今次覺得好嬲嘅時候，只能夠選擇匿名投稿同網友分享。
係咪好奇怪點解中六合彩仲有困擾？其實困擾主要嚟自我阿媽，佢問我老公中咗六合彩點解唔辭職？點解唔同我周遊列國嘆世界？點解唔自己搞啲小生意？最過份係話：「中咗六合彩就唔好要個老婆返工啦！浪費時間！」
我老公真係好好修養，佢次次都一笑置之，反而係我自己好忟憎，始終講呢啲說話嘅人係佢外母，我嘅身份好尷尬。
六合彩中咗咁多年，乜都哦完啦，冇啦啦又投稿走嚟講？係㗎，本身告一段落，但係近呢半年又再煩過，因為香港政局動盪，阿媽又起勢話我哋點解有錢都唔移民，係咁話我哋戇居，揸住嚿錢都唔走。
其實我想講幾百萬絕對唔係咩大錢，首先講下我哋當時點用。
除咗東歐旅行同結婚，第一時間買就係買樓，層樓400幾萬，又律師費又乜費物費，仲要花錢去裝修同埋買傢私電器，陰啲陰啲係咁使，其實筆錢都唔係淨返好多，香港好多人唔使中六合彩都有幾層樓收租，公屋都大把隱型富戶，所以千祈唔好覺得有少少錢就唔使撈。
老公同我都唔肯辭去本身份工，其中一個原因係唔想同社會脫節，至於移民，有冇錢都唔想，我同老公好鍾意香港。
唔知有冇人同我哋兩公婆一樣，基本上係唔識投資，理財方式主要靠儲錢，頂盡買下股票，所以未來係唔會有咩突破性收入（除非又中六合彩啦），亦因為咁，我反而幾欣賞老公，佢冇因為一筆橫財而揮霍無度，亦冇因為呢筆橫財去諗其他不設實際嘅嘢，夠踏實。
最近已經就移民問題同我阿媽嘈過好多次，一聽到佢講中咗六合彩仲繼續返工即係浪費人生，唔知點解我就會無名火起。成日話咩不聽老人言吃虧在眼前，如果我老公當時聽個外母講走去做生意，今次疫情呢個浪可能已經一鋪清袋。
藉此同我老公講聲，Sorry，要你聽外母咁多說話，其實我從來冇打算辭職，你唔好以為我幫你減壓，我同你一樣，只係唔想同個社會脫節，就算當年嘅獎金過千萬都係咁話，有嚿錢back up再繼續返工，心態其實差好遠，我反而enjoy而家咁樣，一切生活依舊。
投稿讀者：Lorraine