如果呢個變態女魔頭有睇你個page，講到粉嶺坪輋咁僻就一定知係話緊佢，不過唔緊要，就係想佢見到。
簡單講下，小妹任職採購部，清一色6個女人加一個50歲阿姐，個別一兩個同事仲有小朋友，但係阿姐唔知係咪單身嘅緣故，平時好多嘢已經極盡變態，千祈唔好畀佢收到風你約咗人要出街，否則一定會搵啲嘢叫你留低OT，我哋已經測試過好多次㗎喇，唔會冤枉佢，更加唔會6個女人一齊feel錯。
有個同事要慶祝結婚周年紀念，買咗隻錶畀老公，因為拎咗出嚟畀我哋睇，又話book咗7:30食dinner，阿姐當晚就搵咗樣嘢叫佢OT，同事話唔得，最多第二日早啲返，阿姐唔畀，話一定要當晚整，結果個同事趕頭趕命做到7:30先call的士走，佢差啲急到喊。
又有一次，男朋友喺樓下等我，我聽電話時講咗句：「好啦，執埋嘢落嚟。」然後阿姐竟然叫我入房，話我呢排做嘢好心散，係咁捉住我傾，結果我男友喺樓下呆等40分鐘。
我哋試過做實驗，早一日大鑼大鼓話其中一位同事老公生日，係咁問佢聽日去邊度食飯，有冇book枱，會送咩禮物之類，結果阿姐第二日真係玩嘢，放工前10分鐘話要開會，困住我哋成個鐘先放人，可憐我嗰次仲同同事輸賭，話阿姐點會咁無聊，點知佢唔止無聊，係堅變態。
仲有好多變態嘢不能盡錄，唯一肯定嘅係，但凡牽涉家人同埋另一半嘅事，阿姐聽到就會黑面，上一秒仲笑笑口同你講嘢，下一秒就好似嬲咗你咁。
前排我另外一位同事真係屋企有事，佢阿媽買餸跌親，好似話喺街call咗白車（後期更加知道係腳趾骨裂），同事收到屋企人電話之後當然好緊張啦，嗰陣大約4:30左右，個同事即刻執袋同阿姐話要早走去醫院，不過阿姐唔畀，佢話仲有個半鐘就放工，唔差咗等多陣，4:30走唔知點扣假，當半日又唔係。
阿媽有事，其實個同事走唔走都好難專心工作啦，擔心再加十萬火急，呢位平時好溫馴嘅同事躁咗，當眾大聲講一定要走，其實個變態阿姐都嚇親，我哋每一個都嚇親，不過阿姐始終要執返個尾彩，理直氣壯訓斥返個同事轉頭，講埋啲九唔搭八嘅嘢，話人工作唔專心、未做晒啲嘢冇責任感……人哋阿媽整親呀，呢個時候唔係講呢啲嘢啦！個同事冇理佢，轉身就走出公司門口。
可能係受到當時現場情緒同氣氛影響，我同另一位同事都有啲激動，我直接向變態阿姐講：「屋企人有事，一定要去睇咗先啦，其實扣半日假甚至一日假有咩咁重要呀？」阿姐怒睥我一下，但未趕得切鬧我，另一位同事已經忍唔住出聲：「其實你係咪有心理問題？我上次約咗老公，你特登要我OT，但人哋今次係阿媽有事，你咁都要攔佢？」
我覺得經過呢次，大家嘅關係已經修補唔到，阿姐老羞成怒叫我哋成team人入房，但幾個同事都唔肯，我諗係嘈得太大聲，老細行埋嚟問咩事，結果大家真係入房傾，不過係連老細都入埋嚟傾。
入到房，阿姐係咁連珠炮發，想先聲奪人向老細打我哋毒針，仲話早走個同事擅離職守，不過我哋仲惡，將阿姐平時所作所為同埋一啲例子擺晒出嚟，嗰次真係終極攤牌，咁阿姐梗係唔認啦！當日非常唔愉快，我哋team亦理所當然成為全公司嘅話題。
同一晚，因為阿媽整親而走先嗰位同事話預咗冇得撈，所以決定第二日返工向老細爆阿姐大鑊，佢當時唔知呢一幕其實已經發生咗，結果我哋幾個決定共同進退，睇下可唔可以內部轉department（因為隔籬team有人試過），假設真係唔得，大家應該會唔做，反正個關係已經前所未有咁差。
其實我哋冇強迫任何同事辭職，自己決定就得喇，畢竟當中有兩個已經結咗婚，負擔比較重，難得嘅係6個同事一條心，佢哋話夾硬留低都冇運行，不如搏一搏。
第二日我哋成team人同老細攤牌，講明一係轉部門，一係唔做，老細叫我哋冷靜啲，一直安撫我哋，然後佢再叫阿姐單獨入房傾，嗰日個氣氛真係世界末日一樣，好在係星期五咋，捱一日就有個weekend過冷河。
到咗星期一，事情有巨大轉變，返到去竟然見唔到阿姐，呢樣係好反常，因為阿姐一定準時9點喺度，跟住老細又叫我哋入房，宣布阿姐調咗去粉嶺坪輋，我哋公司喺粉嶺坪輋有個倉office，其實當時真係唔敢相信呢個係事實，而老細就解釋話，公司好難承受同一時間成個部門走晒，加上知道阿姐個性格好難同人夾，唔止我哋team，其他部門嘅人都同個阿姐有牙齒印，不過就冇可能因為呢件事而炒阿姐，特別係同事屋企有事要早走，公司根本冇權唔放人，技術上係阿姐出錯，為免節外生枝同埋多是非，決定將阿姐調去坪輋，老細冇交代阿姐有冇反對定係點，總之而家個結果就係咁。
阿姐依然係我哋阿姐，佢一樣會吩咐我哋做嘢，但係嗰件事之後，佢只會email同我哋溝通，必要時先會打嚟，我唔知阿姐而家塊面有幾黑，都唔想知，最緊要睇唔到佢個樣，開心死！
一早知公司喺粉嶺坪輋有個倉同office，但係我哋平時係唔會入去，我真係唔知係邊度嚟，試過search，好似話附近有個地方叫烏鴉落陽，都幾特別，不過大家又唔使太擔心阿姐，因為公司每日都有廠車喺幾個港鐵站接載員工入坪輋，返工有一班，放工有一班，由於冇廠車係幾唔方便，所以坪輋嗰邊嘅同事永遠唔使OT，搭正6:15pm架廠車一定會載走晒啲人放工，咁都幾好吖，以阿姐以前咁鍾意OT嘅作風，坪輋雖然係遠，但佢可以晚晚準時走，計落返到屋企應該早過之前，而且坪輋廠房好多男丁，倉同事又大大隻隻，可能佢會喺嗰度遇到真愛呢！
凡事太盡，緣份勢必早盡，我覺得老細都唔想幾個同事總辭然後搞大件事，道理上你移走一個阿姐，一定好過有6個員工一齊離職，不過都要阿姐平時對其他人衰先成事既，我收到風隔籬組都有人好憎佢，今次件事有份交出助攻。
如果我哋幾個同事各自為戰，得一個人嗌走，老細肯定唔會有反應，就係6個人一齊嗌走，老細先會重視同埋思考，所以團結真係成件事嘅關鍵。
投稿人：烏鴉落陽
＝＝＝
出嚟搵食，點解唔可以互相尊重呢？之前有篇投稿又係要扯晒火收場 🔥
《轉工大報復，向舊上司宣戰：「我一定玩殘你！」》
https://hkofficedaily.com/?p=13454