有日一位媽媽帶住位小朋友嚟到診所。
佢行埋嚟登記處：「我哋有嘢想見醫生，唔該你開門呀」
我：「睇醫生嘅登記咗先呀，小朋友睇定你睇啊？」
佢：「我哋冇病唔係睇醫生，你開門俾我哋入去見醫生就得㗎啦，其他嘢你唔駛理」
唔通…搵到嚟診所？
我：「你有咩事要搵醫生呀？我幫你同佢講呀」
佢：「我再講多一次，你開門俾我就得㗎啦，我唔會再講第二次」
我：「要見醫生係要登記嘅」
佢：「我哋都冇病做咩要登記睇醫生呢？」
我：「咁你有咩事係需要見醫生呀？我唔可以無啦啦咁樣俾你哋入去㗎嘛，我都要話聲俾醫生知係咩事先得㗎」
佢：「我再講多一次，你開門俾我就得㗎啦」
咦，你講緊第二次啦喎。
我：「唔好意思呀太太，我真係唔可以咁做，況且仲有其他病人喺度睇醫生嘅，你咁樣都會影響到其他病人，如果你要睇醫生我就同你登記，如果唔係我都冇其他嘢幫到你㗎」
佢：「我要你開門俾我哋入去見一見醫生啫？駛唔駛我哋即刻扮病先可以見到佢呀？」
登記就得㗎啦。
我：「所以你有啲咩事一定要見醫生㗎呢？」
佢：「查實關你咩事呢？我要見嗰個係醫生咋嘛，唔係你喎，我做咩要答你呢？」
你可以唔答我都可以唔俾你入去。
我：「醫生係睇症嘅，入得醫生房都係病人都係嚟睇醫生，如果係其他嘢嘅話，你就等醫生收工嗰陣先同佢講啦」
佢：「唔可以等醫生收工㗎！一定要佢而家做緊嘢嗰陣見呀！」
我：「點解呀？」
佢：「醫生收咗工嘅話，我點教個仔醫生平時係做啲咩呀？我要俾佢睇㗎嘛」
我：「…」
申請參觀嗎？診所係益力X工廠嗎？
佢：「你開門俾我哋入去見一見醫生就得㗎啦，唔會影響到你哋㗎喎」
你嘅存在已經好影響啦。
我：「唔好意思太太，診所不設參觀。麻煩你唔係睇醫生就離開診所」
佢瞪眼望住我，望咗陣，條氣好唔順咁拖住個小朋友邊講邊離開：「個醫生喺度坐監㗎咋！走！」
係呀，我係嗰個獄卒呀，滿意未？
–
👉🏻即睇其他診所低能奇觀嘅文章
👉🏻《診所低能奇觀》 計計懷孕率
https://hkofficedaily.com/?p=15178
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。