商場客戶服務員被鬧 抹完眼淚繼續做

我喺某商場嘅顧客服務counter工作，今日發生咗一件事令我好唔舒服（編按：投稿係半個月前，出稿時已非當日），真係覺得好心酸，因為有位小妹妹同事畀客鬧，雖然佢戴住口罩，但我一樣見到佢流眼淚，同時見到好多客唔會體諒別人，完全冇同理心。

我哋counter有兩個人，即係同時可以處理兩個客，正常情況下當然應付自如啦，但係做過呢類counter或者客戶服務工作嘅人應該知道，返呢行邊有咁順利吖！今日我handle緊一個唔見銀包嘅客嗰陣，隔離個小妹妹同事就處理緊另一單嘢~~~有個阿媽唔見咗個小朋友。

一個唔見銀包，一個唔見咗個仔，我哋兩個都忙到飛起，雖然都係call其他同事幫忙後續跟進，但當時都要抄低好多資料，問好多嘢，妹妹仔同事仲要安撫唔見咗個仔嗰位媽媽，有時咁樣塞一塞，後面條龍就會愈嚟愈長。

解決咗呢兩個大難題之後，跟住嘅客因為唔知道發生咩事，個個一行埋嚟就畀面色我哋睇，其中一個男人仲向住妹妹仔發癲：「打份咁簡單嘅工都做唔掂，吸下停車場飛，人哋問路就答，呢啲嘢有幾難做呀？咁嘅濕鳩工都做到手騰腳震，你點做大事？你一世都只可以做呢啲商場濕鳩工，你讀咁多書咪嘥晒啲錢？有冇中五畢業呀你？」

正當我想出聲之際，有個本身走嚟解決媽媽唔見仔問題嘅senior同事就出手，咁當然亦唔係同客鬥鬧啦，佢都係解釋返較早前有突發情況，所以先會令到後面嘅人等耐咗。

嗰個躁狂男人冇理，繼續鬧小妹妹：「你永遠做唔到大事㗎我同你講，我唔想理你頭先搞乜鬼，手腳慢就手腳慢，你份工大把時間咋，我等住你吸張停車場飛去見客㗎！遲咗你賠唔起！」

由於聲浪頗大，唔好話排後面啲客眼望望，連其他路過嘅人都駐足圍觀，後來躁狂男人終於走咗，我見到小妹妹同事流咗兩行眼淚，雖然相隔只有兩三秒，小妹妹已經即時抹走淚水，但係呢個畫面太深刻，我個心好唔舒服，更加唔舒服嘅係，下一個客行埋嚟，小妹妹又再次用友善態度接待，我見到佢雙眼通紅仍然保持專業態度，除咗佩服，就只能輕輕掃下佢背脊安慰，當中有幾唔開心同埋委屈，只有佢自己心裡最明白。

其實後面被耽誤嘅客，每一個行埋嚟吸停車場飛都黑口黑面，個個都睥住我同小妹妹。

臨收工有另一位同事講起呢單嘢，我明白佢出發點係嬲，亦都不恥個暴躁男人嘅行為，但佢同時虛張聲勢咁教訓小妹妹：「你鬧返佢吖嘛！使乜忍？畀我就鬧返佢轉頭，最多咪唔撈囉！呢啖氣點都要出，你太懦弱喇！」

喺我心目中，呢位講到好激動，又話換轉係自己會鬧返個客轉頭嘅同事，其實同嗰位躁狂男人冇分別，因為佢哋都一樣唔識體諒別人，只係企喺自己角度去睇，批評真係好容易。

小妹妹點解冇鬧返個客？點解仲繼續做？點解流完兩行眼淚要抹走，即時再投入工作？因為佢屋企係單親家庭，媽媽手部勞損暫時返唔到工，有個細佬仲讀緊中學，而家小妹妹已經係全家嘅經濟支柱，佢有嘗試搵其他工，不過疫情兼年尾絕對唔容易，想跳出去唔係一時三刻嘅事，佢冇咁好命可以唞下先，生活太迫人，仲迫埋佢一家人，所以小妹妹同事幾委屈都要吞落肚。

試下多啲體諒別人，香港怨氣同壓力已經好重，無論係個躁狂男人又好，係嗰個講就天下無敵嘅同事都好，少啲指指點點，因為每個人都有自己嘅難處同故事。