受疫情影響，估唔到香港人住返香港酒店會成為一股潮流，上年同男友先後去過3間酒店Staycation，價錢選擇係中位價格嗰堆，其他兩間中規中矩，唯獨是呢間位於灣仔港灣徑一號嘅St Regis 瑞吉酒店令我留下深刻印象，決定投稿講一講，未去嘅朋友不妨趁住Staycation有優惠嗰陣體驗。
2019年先後3次去Staycation都係為慶祝，一次男友生日，一次我生日，而今次去St Regis 瑞吉酒店就係為咗慶祝聖誕，不過我並唔係大花筒，已經特登揀聖誕正日前兩日，平少少都好吖。
先同大家分享入房一刻嘅眼球體驗
想讚一讚個窗簾，兩層係好多酒店基本嘢，但佢係電動，你出門，佢會自動閉上，佢返入房，佢會自動開返，好正，當然你都可以撳掣去control，自己想開就開，閂就閂。
採光一流，其實住酒店最怕「嗰啲嘢」，但係落地玻璃視野咁好，你完全唔會覺得間房會唔舒服。酒店職員有提醒房間玻璃窗真係透明，唔係出面睇唔到入面嗰隻，由於對面有寫字樓，故此換衫記得拉窗簾，我估佢係提我哋搞嘢記得閂窗簾，費事第日有片流出😂
廁所正，廁格一間，企喺度沖涼又一間，仲有個浴缸可以選擇浸浴，個浴缸好乾淨好新好穩固，唔好以為穩固係必然，試過去台灣住酒店，佢個浴缸唔係鑲死喺地板，而係純粹放個浴缸喺浴室，個浴缸係會郁會移位，甚至有機會翻側。
浴缸對住嗰塊唔單止係鏡，其實仲係一部電視，用遙控一開就係，可以同出面分開睇唔同台。另外，浴室有兩個洗面盤，兩口子同時刷牙係冇問題。
Check in之後，酒店職員會喺下午送上小點，味道其實冇咩特別，但嗰份心意就會令人樂透半天，特別對面係office，日光日白有呢個畫面更加覺得自己嘆緊世界。
疫情關係，晚餐冇得喺酒店餐廳食，酒店會改為Room Service形式，搵職員推住餐車入你房奉上食物，亦會留低餐車保暖食物，畀客人自己食完頭盤再拎主菜，食完主菜再拎甜品，結束後隨時call酒店員工上嚟執拾同拎返架車走。
特別提一提，book完酒店後，St Regis係有keep住email我，update下疫情，例如可唔可以喺酒店餐廳食，最後要room service亦會特別提醒我哋。今次Staycation package除咗包早餐，仲可以揀下午茶或晚餐（兩個Menu喺下面），我同男友揀咗晚餐，即係上面你哋見到嗰啲相。酒店喺book完房後一直跟得好貼，要讚！
當晚瞓覺好舒服，張床唔會太軟或太硬，適中，瞓完唔會腰骨痛，但枕頭偏軟，建議去衣櫃自己拎多兩個枕頭出嚟墊，否則條頸會攰。
第二日早餐可以去酒店餐廳食，半自助形式，因為佢主打自選早餐組合，所以任由你行出去拎嘅食物係好少，有各式麵包、果汁飲品、沙律、炒麵、煙三文魚、煙肉火腿。以下係我同男友分別揀嘅兩款自選早餐，我係鮑魚粥，酒店職員推介，不過未算得上好食，點心玩精緻，真係一盅一件，始終St. Regis 係食環境同氣派，唔係嗰類「吃到飽」嘅格局，但係放心，又唔會唔飽嘅。
總括而言，St. Regis 瑞吉酒店附近就係灣仔商業區，冇咩好行，但係全香港啲酒店間間都一樣，除非你住迪士尼；食物可以，絕對唔係難食，但唔會令你留低好深刻印象；酒店內在同房間嘅佈置、清潔度、舒適度，我畀好高分；服務，100分，幫我check in嗰位職員係烏克蘭人，佢叫Oleg Manzhura，喺呢度要高度讚揚佢同埋酒店整體服務。
其實我一直用職員去叫佢哋並唔正確，好似Oleg Manzhura咁，佢比咗張卡片我哋，職位係助理首席管家，佢唔係幫我check in就算，過程一直同我哋傾計交流，仲會帶埋我哋上房，介紹房內物品同設施，St Regis係真真正正提供一個管家服務比客人。
我唔肯定管家服務係咪間間房都有，不過我同男友唔係book最top嘅房，我哋房型係Deluxe Room, 1 King Bed，一晚房價$3288，service charge $328.8，總數 $3616.8，你問我貴唔貴？少少啦！但你問我值唔值？我唔會覺得係浪費，佢畀返我應有嘅環境同服務，Staycation可以一戰。
香港瑞吉酒店 The St. Regis Hong Kong
灣仔港灣徑1號
One Harbour Drive, Wan Chai
+852 2138 6888
圖文：Natalie
版權所有，不得轉載
仲想睇下有咩好嘢食推介，就睇下👉呢到👈啦～