好多人分唔清乜嘢係冇口德，乜嘢係Mean，其實兩樣嘢有好大分別。
我有個同事叫Stephen，把口賤到冇人有，新加坡同香港個旅遊氣泡睇怕都會爆，你鬧政府又好，鬧人防疫又好，其實都冇問題㗎，但佢一嚟就話：「噢，班飛雞又冇得撈喇，應該好多女要出嚟做。」
另一位同事問：「點解要叫空姐做飛雞呢？」
Stephen：「做得空姐都淫啦，有咩咁出奇，夜晚一定叩機師房門。」
同事睇落嬲嬲地，繼續問：「你見過佢哋叩機師房門？」
Stephen：「諗都諗到啦！」
後來我哋先知道，原來嬲嬲地嗰位同事嘅細妹係做空姐，所以Stephen唔知頭唔知路就一嘢話啲空姐係飛雞，即係侮辱緊佢屋企人，只係礙於當時好多同事在場，佢唔想失禮兼失控鬧Stephen。
正所謂狗口長不出象牙，Stephen嘅賤嘴仲得罪過好多人，早排有個同事結婚，冇得擺酒都照派餅卡，算係咁啦，又冇叫你去飲，更加冇叫同事畀人情，但係Stephen竟然對住呢位新婚同事講咗句不堪入耳嘅說話：「你結婚都係想晚晚免費扑嘢啫！」
大家聽到呆咗，點解有人可以咁唔大體？我忍唔住講咗句：「你講嘢好難聽喎！」Stephen笑笑口行開咗。
後來聽返結婚個同事講，佢當時係有少少介意，一段認真嘅感情，神聖嘅婚姻，Stephen竟然講到結婚只係想免費扑嘢。
Stephen就係嗰種典型嘅口沒遮攔，見人嬲就會講句：「係咪唔講得笑呀？」
同事老婆日日整飯盒，Stephen見人唔出去食，從來唔會欣賞個愛心飯盒，或者了解下有咩原因，佢一嚟就係咁講嘢：「好窮呀？日日都帶飯。」當時茶水間有幾個隔籬team同事，你認真發火又唔係，陪佢嘻皮笑臉又唔係，Stephen把口真係臭過坑渠。
其實一個人係咪缺乏愛，先會完全唔考慮別人感受，腦中只有仆街嘢呢？定係Stephen覺得咁樣講嘢好Mean好好笑？
不過我哋個經理早兩日爆咗Stephen一鑊，事源公司棟大廈要行出去食lunch，會經過一個公園，咁你知公園或多或少會有老人家喺度乘涼，百無聊賴咁坐下㗎啦，Stephen行過嗰陣笑笑口講咗句：「都唔明點解啲阿公阿婆要坐喺公園嘥時間，日日戇鳩鳩，不如早啲死咗佢仲好啦！」
大家未嚟得切反應，經理已經開聲鬧：「你有冇家教㗎？留意咗你好耐，叫空姐做飛雞，人哋結婚就話係為咗免費扑嘢，帶飯盒就畀你話窮，老人家坐公園又冇阻到你，你就問公公婆婆點解唔死咗佢，幾次我都聽住，不過有其他team啲人喺度就費事出聲，忍撚夠你，可唔可以積下口德？」
因為經理平時好少講粗口，突然咁躁咁認真，Stephen嚇到即時笠水：「講笑啫！」
經理：「冇人覺得好笑喎！其實你係咪唔會老？你老咗係咪會自殺死撚咗佢？」經理動真火。
Stephen其後以笑遮醜硬撐成個lunch，呢兩日沉默咗好多。做人嘅嘢，面係人哋畀，假係自己丟，講嘢唔該經大腦啦！
你一句隨便嘅所謂玩笑，可能會觸痛某啲人，經理話媽媽都好鍾意落公園坐，因為老人家怕喺屋企阻住班後生，又冇人陪傾計，落街坐下睇下風景，周圍同人傾下計，已經係晚年嘅生趣，而經理個媽媽幾個月前過咗身。
係人都會老，而家啲細路仔大個之後，我哋咪又會變晒阿叔、阿嬸、阿公、阿婆，到時我哋係咪又要死咗佢呢？
－
關於「老」呢個主題，今日《辦公室日報》IG都出咗個小小嘅分享。
🤔 而講起冇品同事，上年出過一篇稿真係好經典，你有冇印象？
《笑同事飯盒得幾條菜：你冇畀家用？》
https://hkofficedaily.com/?p=13025