終於知點解見工唔好Bad Mouth

你哋身邊有冇朋友係充滿負能量,乜都鬧,乜都怨,乜都睇唔過眼,好似要屌晒全世界老母先安樂咁㗎?

舊同學Ricky之前做緊一間印刷公司,出親嚟食飯都係鬧老細,咁好正常吖,我同你平時都會鬧老細,再見多一兩次,佢就開始鬧啲同事,話佢哋一個二個死蠢、偷懶、冷漠,咁我哋幾個舊同學又唔係同佢一齊做嘢,Ricky咁講,我哋就咁聽囉,只係覺得點解一間公司可以容納咁多廢人。

後來Ricky轉咗另一份工,初初都幾好嘅,後期又係屌呢個屌嗰個,連女同事嘅衣著都批評,話人條裙太短唔知搏乜,又屌班同事個個帶飯盒,冇人陪佢出街食lunch……人哋帶飯想慳吓錢食得健康啲都睇唔過眼?

唔止公事,同學約出嚟食飯,自己唔諗地點,唔諗食乜,其他人決定好再揀埋餐廳,佢嚟到又會埋怨環境麻麻、服務唔得、食物普通、價錢唔抵。之但係你問佢有咩好介紹,佢又畀唔到答案你,簡單啲講就係百彈齋主!

有一次,其中一個舊同學要處理一件好緊急嘅公事,所以食飯期間接咗兩個關於工作嘅電話,Ricky就係咁鬧呢位舊同學係死港豬,咁勤力幫公司做嘢係白痴,結果佢同嗰位舊同學嘈咗兩句。

有時一個人勤力,唔一定要標籤佢係港豬,因為喺份糧以外,仲有一樣嘢叫責任感,另外,出嚟社會工作,自己個名都係招牌,我哋拚搏唔一定為公司為老細,其實係為咗自己。

咁深嘅嘢,唔奢望Ricky會明白,但希望佢唔好將負能量發洩喺一班朋友身上,大家識咗咁多年,點解要因為朋友勤力上心而指責佢呢?

我公司係一間幾出名嘅brand,早排做緊減價,所以叫大家有興趣就去個網址睇下,因為用我個staff code仲可以折上折,Ricky都未睇就已經屌定先,係咁踩我間公司啲嘢唔掂,design唔得,就係冇人買先要減價,嗰次我都有啲躁,佢咩都唔知,行過就屌一餐,唔通Ricky真係叻過我公司班marketing同designer咩?

最近一次出嚟,Ricky又轉咗工,呢份工雖然係短期contract,但一樣要畀佢鬧,來來去去都係鬧嗰啲嘢啦,總之老細同事最廢,佢就冷眼旁觀懶得點醒人咁囉,次次都係咁上下,Ricky仲透露最近去見另一份工,話自己同個HR好好傾,全程數臭舊公司唔掂,覺得對方好認同。

真係認同?認同就唔會冇消息冇下文啦,最後Ricky份contract到期,又冇任何offer,佢約我哋出嚟食飯,問有冇工作介紹。

其實Ricky當日遲到,佢未嚟到之前,我哋幾個已經開緊玩笑:「你估吓Ricky哥今日又有咩屌。」而Ricky嚟之前,我哋係傾緊公司有啲空缺想請人,互相問對方有冇介紹,但係Ricky後來開聲話想搵工,我哋都好有默契咁話:「冇,幫你留意下。」

或者我間公司係咁多個同學裡面比較有名氣嗰間,Ricky特別問多我一次,話想去我公司做,其實上次佢先話我公司呢樣唔掂,嗰樣唔掂,而家又好似忘記晒咁。

我哋唔係要報復Ricky,佢一直以嚟都係鍾意認屎認屁,踩低晒身邊嘅人,然後抬高自己,實質上冇對我哋幾個friend做成損失同傷害,不過Ricky份人乜都鬧,乜都怨,乜都睇唔過眼,我真心唔敢介紹佢入嚟我做,因為佢將來一定會喺其他人面前鬧我,鬧我同事,鬧我公司。

以前細個成日聽人講,去見工唔好bad mouth前僱主,當時我覺得呢句說話係放屁,唔通有真相唔講呀?屈服呀?後來工作經驗多咗先至明白,你去interview嗰陣,面對嘅係一間未必請你嘅公司,一個同你萍水相逢嘅HR,對方冇義務要聽你吐苦水,每個人都有自己嘅難題同忙碌,傾心事?搵社工啦。

至於Ricky,我實在聽過佢bad mouth太多人喇,所以介紹佢入嚟做真係不了。

見到Ricky平時批評佢嘅公司、同事,又批評我哋幾個朋友嘅工作,但就走去同個初次見面嘅HR講心事,我突然覺得好犯駁同矛盾。

一個人唔好成日自怨自艾,唔好畀自己充斥太多負能量,唔好係又屌唔係又屌,因為咁樣會嚇走好多人同埋機會。

error: