
上星期喺公司發生咗單黐線嘢,唔投稿攞你五舊水真係對唔住自己!我同事拎咗隻蜘蛛返office養,蜘蛛喎!office喎!
我呢個仆街同事叫阿富,佢當正公司係自己屋企,早排先額外加咗個層架喺枱面,再喺上面陳列佢啲marvel figure,又扮晒文青種盆栽,惹埋晒啲蚊滋,有時請假仲會點我幫手淋水。
盆栽唔同佢計,條友CLS到拎咗隻蜘蛛返office養,我當時見到真係嚇親,唔係細細隻喎,大大隻有毛嗰啲喎,見到已經毛管戙。
我:「你搞乜L嘢呀?」
阿富:「呢隻嘢好易養咋,5至7日先餵一次,擺佢落枱底就得啦!」
我:「我問你搞乜L嘢呀!唔係問你幾時要餵一次呀!」
阿富:「唔係呀,買咗返屋企,我老母話好肉酸,唔畀我養呀,又話驚佢走咗出嚟唔知返唔返屋企好,咁唔買都買咗啦,做個負責任嘅主人,唔好棄養吖嘛,嗱,我真係唔會搞到同事,偷偷地擺枱底啫,ok?」
佢真係完全誤解咗「做個負責任嘅主人」呢一句,你拎返office已經係不負責任啦!我唔係對養蜘蛛嘅人仕有偏見,理得你養科莫多龍吖,但係你喺屋企養吖嘛,帶隻蜘蛛返office做乜春呀?點可以迫同事接受你嘅私人愛好㗎!根本完全唔恰當!
返屋企諗咗一晚,個心好唔舒服,隔籬個同事養蜘蛛令我心理壓力好大,上網再check check,原來啲蜘蛛係食蟋蟀、麥皮蟲,同埋啲唔知咩櫻桃蟑螂,我真係唔得喇,好記得第二日我係一早請咗假去body check,所以我決定隔日返到公司叫佢拎走隻蜘蛛,如果唔係就同阿頭講。
點知咩都唔使講,阿富老母擔心嘅情況喺office發生咗。
我當日做body check,唔係第一時間知,過後先喺公司WhatsApp group見到其他同事討論,好多人都屌晒老母,原來IT同事幫阿富部電腦set up新printer,唔知點樣撞跌咗枱底個膠箱,其實好合理㗎!首先個膠箱唔細,其次係IT同事完全唔知枱底有嘢,冇心理準備下踢到絕對唔出奇。
睇返啲msg描述,IT同事最初以為撞跌普通嘢,烏低個頭想望一望再執返就見到隻毛蜘蛛,佢嚇到成個彈起,其他同事見到又係面都青埋,有女同事仲嚇到喊,真係喊,有人話見到個女同事堅流眼淚,總之個個嚇到咿嘩鬼叫,而最好笑係咩呀,係阿富自己都唔敢去捉返隻蜘蛛。
聽講當日阿頭要「疏散」阿富個位附近啲同事,呢啲case又唔知搵咩人幫手,報警?Call漁農?搵大廈保安?樣樣都好似唔啱。不過你搞到咁L大,就預咗阿頭一定屌爆你,連老細都行埋嚟了解發生咩事,嬲到佢紮紮跳,即場開阿富波,勒令佢諗辦法搞掂,最後阿富個衰仔唔知點樣用掃把撥撥撥,推返隻蜘蛛入個箱度,硬住頭皮搞掂咗。
我都要畀人鬧呀,阿頭話我唔出聲,問我點解見到阿富養蜘蛛唔同公司講,係嘅,我真係有責任,雖然只係早大家一日知,但做咗咁多年人,真係未試過隔籬位同事拎毛蜘蛛返公司養,我都不知所措。
其實公司冇炒阿富已經好厚道,但係好多同事都因為呢件事嬲咗阿富,抵死吖,都係嗰句,我哋冇權干涉同事私人喜好,話之你養科莫多龍,但你拎返公司養就唔啱!
投稿讀者:極度仇富