呢個世界真係無奇不有，今日去見工嘅時候有個男仔同一部電梯，出到嚟先知原來大家都係去同一間公司interview，咁入到去就同receptionist講約咗見工啦，一人派咗張form就坐低慢慢填，當時仲有另一個女求職者等緊。
嗰位女求職者過咗陣就被叫入去interview，剩低我同個男仔繼續填form，大約等咗20分鐘左右啦，之前個女仔見完同個HR行出嚟，Receptionist將我同個男仔張form一次過畀晒HR，仲提醒係個男仔填完先，次序上應該係in完個男仔先輪到我。
如是者，輪到個男仔入去，我又等咗15分鐘左右，然後就聽到好嘈，個男仔出返嚟之後大吵大鬧：「有冇搞錯呀！你哋冇約到我見工就早講啦！」
HR：「我一入房就同你講咗好奇怪，我手上冇你份resume，不過你填好晒form，又係見Sales，已經畀你見埋啦！」
「你畀我見埋有鬼用呀？我做FMCG，你哋做嗰啲唔知咩機，仲嘥咗我咁多時間做自我介紹！」
HR：「你行入嚟冇睇公司名㗎？你冇責任㗎？」
「我見嗰份工係1802室，請Sales，我入到嚟同佢（指住receptionist）講見工，佢又畀張form我，你哋二期就一早出聲啦，我去一期呀！」
HR：「我點知道一期嗰間公司又請緊人呀？你自己唔小心走嚟怪我哋？」
「你哋約人上嚟見工唔係應該有個list㗎咩？名單呀！我上到嚟如果搵唔到我個名，即係冇約啦，冇約你畀咩form我填呀！」
Receptionist都插嘴：「咁即係怪我呀？呢度唔會畀張list我㗎喎，你上嚟話見工，我咪畀張form你填囉，唔通我仲要同你check呢樣check嗰樣呀？我做得邊樣呀？」
「咁你哋咪唔專業囉！」
HR：「其實呢度咁大個logo同公司名，你自己上嚟冇睇㗎？」
「我點知係咪有分公司定係點呀？而家啲公司旗下有幾廿間公司啦，點知你哋一期同二期同一個單位都請緊人呀！」
HR：「咩我哋呀？呢度係二期，邊個知一期間公司都請緊人？你自己冇睇清楚地址，唔好喺度嘈！」
「食屎啦你哋！喺度搞咗成個鐘咁滯，另外嗰邊遲晒大到，我都唔知仲過唔過去interview，DLLM！」
HR：「你唔好喺度講粗口鬧人呀！」
其實個男仔未聽完HR講呢句已經轉身走咗，留低HR同receptionist喺度互相討論。
「痴線！自己擺烏龍去錯地址仲喺度鬧人。」
「勁冇禮貌囉！講晒粗口咁。」
「咁大個公司logo佢唔識睇嘅，邊間公司請到佢真係慘。」
「咪係，唔通我仲要check埋附近有咩公司請緊人呀？行過去一期睇下1802室係咪請人先出招聘廣告呀？痴線！講嘢都唔經大腦！」
佢哋傾完一大輪，終於記得我存在喇……
HR：「你係嚟見工㗎？地址啱唔啱先，我哋係二期1802室，公司名XXXXX，有冇錯？」
我：「冇錯，我叫Stephenie，約咗嘅。」
HR帶我入房之後，佢用咗15分鐘喺度呻頭先件事，咁我都有俾面回應幾句嘅。
我：「又真係巧合咗啲嘅，一期，二期，都係1802室。」
HR：「我理得佢巧唔巧合吖，你去見工，有責任睇清楚公司地址㗎喎！」
我：「咁又係，而且樓下有公司水牌，換轉係我都會再confirm下嘅。不過講開又講，呢度啲一期二期係幾容易搞錯。」
HR：「嗌外賣都試過送錯啦，上次送外賣個哥哥打嚟叫我出門口拎，我出到去人影都冇隻，原來佢去咗一期，不過送外賣我唔怪佢吖，頭先個男仔係過嚟見工喎，佢真係有責任睇清楚㗎，我又日日要見咁多人，點同你逐個check呀？你話見IT，我公司冇請IT都可以即刻知吖，你見Sales咁普通，我公司keep住請Sales，你明唔明呀？點知佢搞錯呀，我成朝都見緊Sales！」
仲未知呢份工請唔請我呀，不過感覺上冇乜機會，因為見工嘅過程當中，HR似乎仲畀嗰件事困擾，三句唔埋兩句又呻返轉頭，好似唔太專心同我interview，本身想畀個建議佢嘅，不過費事啦，唔通教佢做嘢咩！
好多公司約candidate上嚟見工嘅時候，都會將個名單畀receptionist，當然唔使畀resume啦，有人名同約定時間就已經足夠，然後receptionist見有人嚟就問咩名，剔一剔代表到咗同埋冇錯，好似餐廳訂位咁樣，其實好簡單。
咁當然啦，一期二期搞錯，同一個room number，又係見Sales，間公司冇list畀receptionist剔……呢度又真係有好多巧合加埋一齊嘅。
《情侶座》有新稿
男友過份要求 女友無法忍受
「佢問可唔可以戴住VR做」
https://hkofficedaily.com/?p=22368