同好多品牌一樣，我哋都會將一啲過期嘅貨品先儲存喺倉，隔一段時間就會拎去銷毀，公司主要嘅product係化妝品同香水，但早前就有一個員工私自將過咗expiry date嘅貨轉售圖利。
呢位員工用呢種方法賺咗幾個月外快，之所以會揭發出嚟，係因為有人向公司投訴，表示買咗我哋嘅香水發覺味道同坊間有出入，check返包裝見到有兩個expiry date，一個已經過期，一個就未過期，公司知道之後好緊張，所以追查返整件事搵出真相。
根據投訴人提供嘅資料，公司首先搵到出售我哋化妝品同香水嘅IG shop，再check到賣家係一位貨倉同事，本身佢就係負責處理同運送過期貨品，不過佢冇按程序拎去銷毀，反而影相擺上網賣，仲要偽造另一張expiry date嘅label，結果搞出今次風波。
嗰位貨倉同事強調只係唔想浪費，仲話香水根本唔會過期，就算過咗expiry date都唔會有影響，其實呢一點正正係每個品牌最擔心嘅一環，冇錯，因為香水有70％或更多嘅成分係酒精，故此過咗expiry date嘅香水並唔容易變壞或者發霉，但就會出現變色同埋變味嘅情況，對brand image絕對唔係好事，加上你唔知有冇人因為用咗而令皮膚出現異常情況，屆時法律責任將會更大。
貨倉同事仲話，反正公司拎去銷毀，所以唔算係偷，其實點會唔算呢？畀係一回事，不問自取又係另一回事，而家仲要不問自取再拎出去賣，當然有問題啦！何況仲要整過張label老作expiry date，更加係另一個層次嘅事。
呢個case同多年前嘅Chanel事件相似，話說有個法國Chanel員工喺2011至2014年間，串通負責運送銷毀品去回收場嘅貨車司機（亦係女職員嘅丈夫），喺過程中偷偷將啲化妝品、指甲油、香水、唇膏等等搬走，又係重新打上expiry date轉售圖利，3年間賺咗14萬歐元嘅淨利潤（約125萬港元），而案中仲有5個同黨，即係總共7個人犯案，Chanel將呢件事告上法庭，最終嘅索償金額達到300萬歐元，真係賠凸，總未計牢獄之苦。
其實奢侈品大brand將賣唔晒同埋過期貨品銷毀一直都令人議論紛紛，有報道就講過Burberry每年銷毀嘅貨品包括手袋、飾物、時裝、香水，同埋化妝品，加加埋埋總值2860萬英鎊，即係3億港元左右，Hermès同Richemont都喺年報披露過銷毀品價值過億，美其名係要防止商品貶值，講白啲就係丟咗都唔益你，太多貨又點會有炒價呢？
而我哋公司主力出香水，要面對嘅問題係過期，而唔係過季，當然品牌知名度唔能夠同Chanel、Burberry、Hermès呢啲超級大Brand相提並論，加上嗰位貨倉同事唔算賣出好多單，所以最終冇告上法庭，只係解除合約了事，叫做大事化小。
偽造expiry date肯定唔啱，但係公司嘅銷毀品畀員工拎走又當唔當犯法呢？假設有人齋攞但唔轉售圖利，純粹自用，又應該點處理呢？最近我都喺度諗呢個問題，有機會希望聽下大家意見。