回想起呢3年嘅開心日子，黑暗應該好快會重臨喇，一切從2018年講起……
同好多人嘅公司一樣，我呢度嘅氣氛都係唔和諧，50歲單身阿姐每日喜怒無常，同team同事人人自危又要爭表現，其他部門就好似有仇一樣，問嘢唔想答，交接工作唔想跟，總之互相卸膊，個個滿肚密圈，office裡面傾到計嘅人五隻手指數得晒。
老實講喺度返工心很累，但更老實講人工係比起出面好，我呢啲有老婆仔女又供緊層樓嘅人，只能夠講句食得鹹魚抵得渴，各人有各人嘅包袱，生活就係咁㗎啦！
阿姐特別仇視已婚同埋有拖拍嘅同事，盲嘅都睇得出，情人節如果有人送花上office，佢會無緣無故好嬲，早幾年就有個女同事收花，阿姐一句就ban埋去話好似拜山咁，紅玫瑰點樣似拜山呀？冷靜少少啦！然後又發脾氣話唔好再擺花花草草喺個位，會惹蚊喎！
聽講我未入嚟做之前，曾經有個同事因為有親戚過身要請兩日假，阿姐唔批，話放工去靈堂就夠，最多畀佢五點走，唔明白點解要請孖day，個同事解釋第一日去靈堂幫手，第二日要上山，不過阿姐仍然諸多留難，結果兩個人炒大鑊，個同事即刻落街撳錢賠一個月畀公司辭職。
我曾經問過另一位較為熟嘅資深員工Michael：「有證明可以唔批喪假㗎咩？」
Michael：「當時已經唔係證唔證明或者勞工法例問題，係個同事太嬲，決定要反面劈炮。」
我：「其實阿姐單身咗幾耐？係離咗婚？受情傷分手？定係點？」
Michael：「我喺度做咗12年，未聽過亦都未察覺過佢有拖拍，好合理嘅，單單睇副尊容都唔開胃，仲要咁冷血，心地咁差。」
我：「原來相由心生呢句說話係真，你做到12年咁耐好勁！」
Michael：「當你有一個女讀緊中學，一個仔讀緊大學，老婆冇返工，外母仲要同你一齊住，再要養個賓妹，我相信你都會好似我咁勁。」
辛苦晒Michael！
其實阿姐又唔止針對下屬，佢同隔籬左右全部department都係敵人，仲成日叫我哋唔好同其他team咁熟，咁當然啦，其他team都唔係傻，一樣咁憎我阿姐，一樣唔會同我哋玩，所以工作上唔想跟唔想交接唔想答就係咁解，office裡面每個人都有一道好高嘅城牆，即使係Michael同我之間都有，只不過有時大家吐苦水，食lunch有個伴，叫做傾到幾句計。
某日我拎份文件去隔籬team，畀一個又係出晒名西口西面嘅女人Sabina，預咗佢會留難㗎喇。
Sabina：「呢單嘢唔係我跟開㗎喎！」
我：「唔係喎，Karen放假，係要畀你跟㗎喎！」
Sabina：「咁你咪等Karen返嚟先囉！畀我做咩啫？」
我：「趕住批船期㗎，Karen放產假點等呀？」
Sabina：「總之呢單嘢……」
喂，喂，Hang機呀？見到Sabina講講下停咗，眼神望向我右邊，突然feel到一個好高嘅黑影企喺側邊，平時又係西口西面嘅HR露出一副我入職後從未見過嘅笑容。
HR：「咁多位，同你哋介紹，呢位係新同事Ian，佢係Sales Support嗰邊嘅。」
Ian好怕醜：「Hello, Hello…」
坦白講我都唔算矮，不過拍落去仲矮半個頭，HR企側邊直情成個哈比人咁，Ian個樣好細個，有啲似德國體操運動員阮馬素，照計都應該係混血兒，但真·阮馬素係好矮，呢個假· 阮馬素係好高，外型絕對無敵，入娛樂圈都得啦，做咩咁傻返Office呀？
再望一望我眼前成班女同事，無論係二十幾歲、三十幾歲、四十幾歲，甚至有幾個照道理應該收咗經嘅老女人都變晒心心眼，似乎已經通返經喇！離遠望到我阿姐都伸高個龜頭出嚟（唔係講鹹嘢，女人之家佢個頭係有啲似烏龜），仲有好多女同事我從未見過佢哋有笑容，忽然間好似有道光打落去咁，個個人生充滿希望。
HR繼續帶Ian去其他部門介紹嘅時候，眼前嘅Sabina亦放棄同我爭辯：「你擺低份文件啦！」然後就擰轉頭同佢後面嘅同事講：「你見唔見到呀？好靚仔呀！」
返埋位坐低唔夠幾秒，阿姐行埋嚟我哋個位度：「新同事好靚仔喎，你估佢係咪混血兒？」講嘅時候係一直望向遠方嘅Ian，咁我亦唯有答：「係啦，好靚仔，似係混血啦！」
阿姐繼續望遠方自言自語：「呢啲小鮮肉實有女朋友啦！」
嘩！你唔收經都唔該收皮啦，Ian有冇女朋友關唔關你事呀？自量少少先，人哋叫你做媽媽都唔過份呀！
再隔多陣輪到Michael走嚟同我講：「喂，我去約個新同事聽日食lunch，今日佢實同自己team食，我哋聽日同佢welcome lunch啦！預埋你！」
我：「有需要咩？都唔同team，一陣阿姐實畀面色我哋睇。」
Michael：「肯定唔會，信我，同呢個Ian熟有著數呀！就咁話，佢行去pantry喎，我埋去約佢先。」
新人咋喎，又唔係高層，最初我好懷疑同Ian熟絡會有咩著數？但不得不承認一句，人老精鬼老靈，Michael喺呢間公司生存咗12年，果然唔係省油的燈，Mark實小鮮肉Ian嘅好處完全超越我想像，喺office嘅日子直頭係重光！（未完待續）