每日朝早11點半左右，office就會傳出叩叩叩嘅高踭鞋聲，步步響亮，傾計吹水嘅同事會即刻醒水散開，因為大家都知道老細返咗嚟，而其實我老細係男人，一個60幾歲好多白頭髮嘅男人，高踭鞋聲唔係屬於佢，係來自佢身邊嗰位MK妹。
MK妹就好似護法一樣，只要老細喺office出現，佢都會形影不離常伴左右，但成個畫面係好唔和諧，首先講年紀，MK妹目測真係得21, 22歲，當佢童顏巨乳，都肯定唔超過27, 28歲，頭先都講咗啦，老細60幾，個樣仲老過我阿爸。
講開畫面違和，老細唔止老，仲要寒背，本身已經唔高，寒背直頭更矮，而MK妹就屬於瘦底高挑，加上例必著住幾吋高踭鞋，拍埋一齊最少高老細大半個頭。
衣著方面，老細係典型阿叔style，冇款淺藍色恤衫似足校工，加條吊吊地腳嘅西褲，而MK妹例牌濃妝豔抹，春夏秋冬一樣著住超短裙，你話佢哋係兩爺孫都有人信，講開又講，濃妝豔抹先係似21, 22，真實年齡都唔大得去邊。
如果有新同事返工，見到呢個畫面一定會好奇怪，但我哋已經慣晒，近一兩年都睇住老細拖實MK妹返工放工，有時就輕按MK妹屁股行過，而嗰條女又好乖㗎喎，每日淨係入老細房陪坐，佢冇電腦用，自己坐喺度玩手機，同埋佢哋唔會閂門嘅，偶爾有senior同事入去同老細傾嘢，MK妹唔會刻意走開，只會keep住撳電話自娛。
不過拖手同輕按屁股已經係極限，未見過佢哋喺office錫錫或者做其他親密行為，有senior話老細同MK妹喺房裡面會除口罩，條女個樣真係好細個。
其實MK妹連行去pantry斟水或者去廁所都好少，每次返嚟就陪老細做嘢，由11點幾坐到4點幾咁上下，有時想趁佢行過撞口撞面say個hi，聽下佢有冇鄉音之類，可惜搵唔到機會，MK妹亦唔會望我哋，未見過佢同任何同事傾計同打招呼，係睇唔起我哋吖，抑或自己都尷尬想避忌呢？咁就真係唔知喇。
老細嘅婚姻狀況都係一個謎，有傳佢結咗婚，有傳佢離咗婚，有傳呢個就係佢老婆，個個傳言都唔同，連啲高層同senior都眾說紛紜。
有個男同事曾經講笑咁話，好想走去同MK妹主動傾計，因為想了解一個後生女嘅心路歷程，係乜嘢令佢唔介意日日陪個阿叔返工呢？仲要大半日陪坐陪做嘢好似冇靈魂咁。
我：「你好似想做社工救人出火坑。」
男同事：「唔係，我主要係想知市價，究竟要出一個乜嘢價錢先做到咁樣啫，10萬一個月？20萬一個月？會唔會係屋企有事先跟老細呢？佢自己未必覺得係火坑㗎！」
換個角度睇，老細又幾「專一」㗎喎，兩年嚟都係拖住MK妹返工放工，完全唔理成班員工嘅眼光，可能係真愛都唔定？戲都有得做啦，《喜劇之王》裡面個龍少咪大灑金錢搵初戀嘅，所以有錢人係特別任性，雖然唔知呢種係咩心態，每次望住老細同MK妹就會諗起台灣嗰對爺孫戀。