陪個朋友去買手機，佢問咗sales哥哥起碼5次：「whatsApp message係咪全部keep得返㗎？」
對方都繼續好有禮貌咁答：「係，不過要少少時間，你留朋友個電話號碼畀我吖，搞掂即刻call你，你哋應該喺呢個商場活動㗎嘛。」
我朋友以前唔會重覆問咁多次，佢係一個唔囉嗦嘅人，不過呢兩年變咗，變得有啲長氣；佢以前三餐都出去食，而家會趕返屋企同老竇食住家飯；佢以前只會同女友去日本或者歐洲旅行，而家會同老竇返鄉下探親。
我問佢究竟係邊條女啲message咁緊要？問咗咁多次會唔會keep得返。
佢答我呢條女係佢阿媽。
佢阿媽兩年前因為癌症離開咗，我都有去auntie個喪禮，其實啲WhatsApp message全部係「今晚返唔返嚟食飯？」、「落雨有冇帶遮？」、「今晚翻風，唔好做到咁夜。」
而我朋友大部份時間都冇覆，所以對話內容好單向，不過佢仍然想留住阿媽send畀佢嘅每個message，間唔中翻睇之餘，又會得閒send message去阿媽手機舊number，偶爾講句「好掛住你。」今次輪到佢唔會收到阿媽任何reply，一樣咁單向，只係位置互換。
唔係每個人都咁幸福仍然有阿媽愛錫，仍然可以同阿媽去飲茶，但係如果有心，無論喺唔喺身邊都好，每一日都可以係母親節。
母親節唔單止要祝天下母親快樂，同樣希望所有仔女都健康快樂，因為作為仔女，你過得好，你媽媽先會真正快樂。