我去完倫敦，到我同team另一位同事放假去曼谷，隔離department有個super old seafood唔知點解好唔抵得，走埋嚟我個位前面講咗堆垃圾：
「你哋就好啦，成日可以放假旅行。」
我唔係唔想應佢，不過當時真係好忙，放完假返嚟九萬樣嘢要follow，冇人睬你就過主啦！點知佢仲係唔走：
「但係咁樣放，你哋阿姐都批咩？去咁多日使咁多錢，又白做啦，哈哈！」
我諗唔出句聲佢係會賴死唔走㗎喇。
我：「關你鬼事咩！我哋鍾意點放就點放啦！咁得閒嘅你？唔同你講住，打畀個求職者先。」
見佢面色一沉，然後粒聲唔出走咗，我就係想咁之嘛。
呢個super old seafood唔係第一次，我哋有同事生日買蛋糕返嚟切，佢唔抵得；我哋有同事攞假去旅行，佢唔抵得；我哋全team放工一齊走去食飯，佢唔抵得。
世界上有啲人好奇怪，會無緣無故睇你唔順眼，你努力工作時，佢扮睇唔到，你收成嗰陣，佢突然又睇得返嘢，仲要過嚟畀說話你聽，總之見到你好，佢個心就會唔舒服。
我呢一年收咗火，亦都明白唔使同呢啲人計較，佢只係一粒微塵，勞氣有失身份。
好似我去倫敦旅行期間，經理人姐姐收到一個inbox msg，佢睇完好嬲，內容係有個人話辦公室日報廣告太多，令故事可信性減低。
經理人姐姐喺whatsapp send咗cap圖嚟，然後打咗一堆字：「雖然大家都好忙，其實無時間嬲，但我想話睇到呢個inbox，真心有少少想鬧佢，我心諗，寫廣告想真心分享故事又唔得，依加廣告商養緊班故事人，喺最尾賣個廣告都話唔得，咁你個個月課金囉咁唔想睇廣告。」
因為呢個問題我講到口都臭，電視有廣告你唔投訴，買份報紙雜誌要畀錢但有廣告你唔投訴，開個新聞App有廣告彈出嚟你都唔投訴，偏偏睇一個免費嘅page有廣告你走嚟投訴，即係點？大公司唔敢嘈人，搞啲細page？見紋身大隻佬就縮，蝦啲手無寸鐵嘅平凡人就行出嚟？
我所有真心故事分享你唔讚，但有廣告你第一時間插，其實咪同我公司個super old seafood一樣，總之見到你好，佢個心就會唔舒服。
我冇嬲，化晒，反而心痛身邊嘅人咁緊張，因為過咗一日，康仔睇我post嗰陣又見到一個留言，佢又係嬲過我，當時個留言係咁講：「你賣廣告連身邊人故事都出賣，真係好厚顏。」
我二話不說直接block，唔係因為嬲所以block，係垃圾留言唔想佢存在喺我個page，然後我又發覺如果有人係睇你唔順眼，你創作故事，佢會話你唔真實，你寫真事，佢又會話你出賣身邊人，我哋根本冇能力討好全世界所有人，但有能力將呢種負能量剔除，好多人唔鍾意你係唔使原因，總之見到你好，佢個心就會唔舒服。
對於身邊睇我哋唔順眼嘅人，我有兩句忠告。
你冇資格干涉別人嘅生活或者工作模式
但你絕對有資格同埋權利挖盲自己對眼