上星期收到個來歷不明嘅WhatsApp，對方唔喺我contact list入面，一開始以為係啲詐騙嘢，你知呢輪唔係咩投資就係電影問卷調查㗎啦，點知第一句msg就係：「叫你同事XX健盡快還錢，否則後果自負！」XX健個名有啲陌生，又有啲熟，對方仲send咗幅圖畀我。
畢竟唔係contact list嘅人，對方send圖嚟係會濛咗，要我手動撳個下載箭咀，嘩！點知係咪咩病毒呀？睬佢都有味啦！但係我好快就收到一位舊同事WhatsApp，個舊同事話：「你收唔收到呀？阿健畀人追債喎，身份證都send埋嚟，搞咩呀佢？」
我：「你又收到？有身份證咩？我唔敢download呀，驚撳完會畀人hack電話。」
舊同事：「唔係link嚟㗎，嗰幅係圖，係阿健張身份證，條友開頭講全名都唔知邊個，睇埋相即刻記得喇！阿健唔係好有錢㗎咩？」
因為舊公司4年前執咗笠，就算阿健都已經係舊同事，成班舊人閒時都會出嚟食飯聯誼下，但就唔會叫阿健，因為佢份人好沙塵，唔係話炒股賺大錢，就係話賭波賭馬執咗一大筆，最鍾意炫耀自己成身名牌，笑同事啲西裝係G2000唔出得大場面，話人哋隻錶冇牌子不如唔好戴。
阿健好唔識尊重人，鍾意叫同事做「柒頭」、「毒撚」、「撚樣」、「木咀」，人哋冇名㗎咩？同你好熟就話啫，有啲平時冇兩句都係咁樣叫人，點應你呀？個個都玩得咩！所以阿健都幾乞人憎㗎！
最經典係當時有個同事放完大假，人哋去完旅行返嚟派手信，阿健一手接過草餅，同時向住個同事講：「你條契弟未死咩？咁耐唔見嘅！」
我唔知呢個係咪阿健同人嘅溝通方式，想講嘢貼地啲拉近距離？覺得好風趣？但佢同派手信嗰位同事肯定未熟到可以稱呼對方為「契弟」囉！人哋嬲你都好正常吖！
我都嬲過佢㗎！試過幫阿健順路買外賣，返到嚟嘅時候條友遞咗張50蚊紙畀我，咁咪找返5蚊畀佢囉，點知阿健話：「唔使啦，5蚊當係車馬費，你係值咁多㗎咋！」真係冇句好說話。
講返追債單嘢，與其私下議論紛紛食花生，最需要都係搵當事人了解清楚發生咩事，收數佬有我哋電話Whatsapp，諗深一層都驚㗎！
將收數佬嘅msg cap圖send畀阿健，估唔到佢好快就回覆，仲要係直接打電話嚟：「你都收到？咁就大鑊喇，即係仲有其他舊同事都收到啦！」
我：「係呀，唔止我一個。」
「Sorry，搞到你！」嘩，講sorry呀，我真係第一次從阿健把口聽到呢個英文字，以前佢乜都死剩把口，做錯嘢都唔會認㗎！
阿健一五一十講晒成件事嘅來龍去脈出嚟，原來佢喺舊公司執笠之後，夾埋幾個friends喺銅鑼灣開咗間車仔麵，奈何生意唔理想，後期一直要借錢周轉，銀行又借，親戚朋友又借，正統財務公司又借，不知名嘅財仔都借，可惜最終都守唔住，要摺咗間舖。
其中喺一間財仔借錢嘅時候，人哋要佢交部電話出嚟抄低晒contact list入面嘅資料，所以我哋嘅電話號碼就咁揚晒，不過話時話，乜財仔有資格咁樣check人電話㗎咩？而且都講咗啦，我哋同阿健喺舊公司執笠後已經好少聯絡，你個WhatsApp要抄到幾盡先有埋我哋number呀？
阿健透露自己喺出面爭緊7位數，呢間財仔只係佔當中幾萬蚊，而家最擔心係收數佬上門貼大字報同埋淋紅油喎，為咗唔好嚇親屋企啲女人，佢已經安排阿媽同細妹去親戚屋企暫住，但自己每日返屋企都提心吊膽，又唔敢開燈，要長期扮到屋企冇人。
當然啦，以上都係阿健自己講出嚟嘅版本，係咪咁簡單呢？我都唔肯定，只係阿健嘅態度語氣比起以前唔同咗，霸氣盡失，認低威講咗幾次sorry同埋對唔住，睇嚟生活真係磨蝕咗佢嘅輕佻性格。
阿健仲開口問我借錢，借2000蚊……
佢都有問另一位舊同事借錢，又係借2000，嗰位舊同事冇借，仲覺得阿健抵死：「以前笑人著G2000，而家霉到要問人借2000，笑死！」
我冇笑阿健，但係都冇借畀阿健，因為我知一定收唔返，自己未去到咁大愛，同情還同情，大家唔係friend到可以無條件借錢，我係咪好衰？(完)