長話短說，公司請去東京旅行，total 31人有三日兩夜時間，星期五皇恩大赦唔使返，當日出發，星期日晚就返香港，短係短啲，不過講到尾都唔使錢，老細包酒店機票之餘仲請晒咁多餐，如果你想自己出去食就提早講，因為全部餐廳一早訂好位，咁我覺得呢個安排都合理嘅。
除非你要自由活動自己食，否則有權全程一蚊都唔使畀，shopping就梗係自費啦！錢唔使愁，但係有其他嘢要愁，先講第一晚，老細請我哋去一間叫御八嘅居酒屋食飯，期間有個男同事Brian飲大咗，係咁調戲另一位女同事Michelle，又摸手仔又搭賻頭。
咁點解其他同事唔幫忙解圍？咪就係因為Michelle受囉！條女攬返Brian轉頭添呀！當我以為佢哋本身有嘢或者一直地下情嘅時候，點知……
「你玩L完未呀？」突然有一位叫Joan嘅女同事向住Brian咆哮，以為佢想保護Michelle，怒斥Brian鹹豬手之類啦！Diu！唔係呀，下一句先至嚇親我。
Joan：「你係咪當我冇到呀！係咁攬住第二條女，使唔使送埋你哋返酒店搞嘢？」
所有同事都目瞪口呆，乜Joan同Brian係一對㗎？佢兩個喺公司冇乜交流，完全睇唔出喎！
你又估唔到出聲打圓場嘅係老細，佢即刻嗌埋單，叫大家唔好再玩，好明顯係驚玩出火，呢個時候Michelle面都青埋，即刻縮開攬住Brian隻手，冇錯呀，佢真係攬返Brian轉頭，而Brian就醉到冇知覺，我懷疑佢係知道瀨嘢先至扮晒不醒人事。
最終Brian畀兩個男同事扶返酒店，好在間居酒屋距離酒店比較近，行路唔使10分鐘，而Joan就全程黑面，有幾個女同事狀似安慰佢，咁Michelle呢？呢條女行到最前，一支箭咁標返酒店，可能怕面對Joan啦！我就同另外幾位同事行到最後食花生，真係估唔到今次公司旅行第一晚就咁精彩。
因為今次嘅安排係女仔同女仔一間房，男仔又係同男仔一間房，之前都冇認真數過，原來我哋公司嘅男女分佈係啱啱好，老細已經係唯一多出嚟嗰個，佢自己一間房，相信係出發前已經計過度過。
喺居酒屋嗰陣Joan講咗句「返酒店搞嘢」，最終竟然一語成籤，不過唔係Michelle同Brian搞嘢，係另一pair同事Debbie同阿仁，佢兩個其實係公開咗嘅一對，當晚返到酒店我都未沖涼，Debbie就走過嚟敲門：「唔好意思呀，可唔可以同你哋調房呀？我想同阿仁一齊瞓呀！」
妖！幾多歲呀仲要一齊瞓？想借間房搞嘢就搞嘢啦！
我都唔使開聲，同我同房嘅女同事阿茵已經搶先拒絕：「梗係唔得啦，咁我哋瞓邊呀？」
Debbie：「瞓我房囉，我同Sharon一間房，你哋可唔可以同佢瞓呀？或者我叫Sharon過嚟你哋房瞓都得，唔該你哋吖，不過Sharon好堅持要一個人瞓一張床，要委屈你哋孖鋪。」
講返先，我哋啲房全部係兩張單人床。
我：「吓！我真係唔慣同人孖鋪喎！不如咁啦，你叫阿仁去另一pair男仔間房瞓啦！」
我真係唔想搞到咁麻煩，當時啲胸圍底褲已經攤晒喺床，唔好叫我又要執行李換房咁老土啦！
擾攘咗一輪，最終佢條仔阿仁成功同其他男同事換房（阿仁同房個男仔走去搵另外兩個男同事一齊瞓，讓咗間房出嚟）
，不過故事未完，凌晨2點有人撳我哋門鐘，夜媽媽真係嚇死，原來被Debbie「丟低」嘅Sharon自己一個瞓好驚……
結果我哋都係3條女瞓，阿茵唔肯讓張床出嚟，我做好心同Sharon孖鋪，半夜畀佢一個拋鎚打落個肚度，真係痛到醒咗同埋嗌出聲，好在唔係有BB咋，真係畀佢打到流產都有份！
第二日我哋3條女都叫Debbie唔好搞咁多嘢喇，三日兩夜都淨返兩日一夜啦，唔使咁痴纏喎！
講返結怨嗰對情侶先，第二朝已經見到Brian痴住Joan坐喺酒店餐廳食早餐，應該係跪咗玻璃，而Michelle就同Joan繼續面左左，究竟佢哋返到香港點面對大家呢？條仔係Sales Team呀，不過Michelle同Joan就係同部門，將來真係好睇過戲。
第二晚終於安靜喇，我同阿茵上咗房又覺得晚飯食唔飽，所以凌晨點幾鐘走落便利店買宵夜，因為有間Lawson喺樓下，但竟然咁啱見到一男一女已婚同事喺我哋前面（係分別已婚，佢哋唔係兩公婆），女嘅我稱為X，男嘅我稱為Y啦，佢兩個蹺住行呀Diu！可能係覺得呢個時份好安全啩！其實成30個同事一齊旅行，點會個個都咁乖早睡早起呀？人類緊火起上嚟真係不理後果……
同X同房嘅女同事Vani，我平時同佢都有兩句，第二朝即刻搵Vani八下，原來X成晚冇返，不過食早餐嘅時候都係見到X同Y，佢兩個喺其他人面前就好似唔熟咁，最癲係返到香港之後，X嘅老公有嚟接機，算啦，可能係我思想污穢啫，或者呢pair人夫人妻只係散步，或者瞓唔著出去飲杯嘢啫，起碼冇騷擾其他同事嗌換房吖！
呢次公司旅行真係迫晒啲痴男怨女現身，煲劇都冇咁精彩，而家已經傳緊X同Y有路喇，不過唔係我爆，都唔係同X同房嘅Vani爆，因為有同事朝早走去跑步，撞見X同Y落的士返嚟酒店，嗱，我食花生㗎咋，冇周圍唱人呀，投稿都化晒佢哋啲名，算係咁啦！(完)