2023年仲有個半月就完結，今年真係好黑仔，我老豆3月嗰陣工傷，整親隻手打晒石膏要留喺屋企休養，我就早佢一個月冇工返，所以兩父子由當時開始喺屋企你眼望我眼，間中陪佢去覆診，有時又會飲下茶，我覺得嗰段日子都還好，初時未算太大壓力。
不如講下我點解失業先，正如江華所講，真係衰在太有自信，為咗拎假去一個長旅行，我同上司鬧得好唔愉快，嬲嬲地咪遞信辭職囉！了無牽掛去歐洲不知幾爽，同埋我唔覺得搵工會有好大難度，send多幾份CV咪得囉……點知我太高估自己，亦太高估香港嘅市道。
我啲牛脾氣應該係遺傳自老母，因為佢比我更火爆，今年5月嘅時候，佢又係同人鬧交，我老母做清潔外判，佢真係好好火，日日返嚟唔係話同阿頭嘈，就係同同事嘈，最後一次更加同個客嘈，佢喺人哋office吸塵嘅時候被投訴，個客好似話聲浪太大影響工作，如果係真事，咁個客又過份啲嘅，吸塵你想幾靜呀？然後老母個阿頭仲要佢向人道歉，我老母寧死不屈，即刻劈炮唔撈，幾L有型！
換言之，5月嘅時候我哋一家三口就齊齊整整每日喺屋企，老母陪老豆覆診同埋做物理治療，我就負責去攞位飲茶，寫意到呢！
不過我哋其實唔止一家三口，我仲有一個阿哥，一個細佬，佢兩個分別喺6月同7月被炒，阿哥就一早有先兆㗎喇，上年已經聽到佢話公司會裁員，但唔知點解捱下一個月，捱下又一個月，到以為只係傳聞嘅時候就突然派大信封，所以阿哥其實有筆類似遣散費嘅錢，失業未算好愁。
細佬就柒啲，佢真係畀人炒，原因都唔使解釋㗎喇，全家有眼見到，份工返9點，佢一個星期梗有兩三日係9點先起身，咁大個人叫極都唔醒，唔通真係搵盆水淋鳩你咩！我細佬請假都密㗎，所以佢被炒一啲都唔意外，終於可以日日瞓到「黃朝百晏」（正字應為「皇朝八晏」），如佢所願啦！
香港人一定聽過：「我全家都好幸福喎！」但我呢個進化版犀利呀，可以同啲friend講：「我全家都失業喎！」
全家失業係咪愁雲慘霧？其實又唔係喎，7月嘅時候我哋成家人不知幾happy，老豆買咗部卡拉ok返嚟，老母仲叫埋隔籬屋張師奶嚟唱，搞到屋企變咗Neway，我哋又去咗個短旅行，都咪話唔過癮，嗰段日子真係全家人喺度廢，唔知仲以為我哋係拎綜援嗰啲呃錢新移民，直至9月底就發生咗變化，細佬竟然爆冷率先搵到份新工，最懶嗰個最快有工返，所以求職多多少少都要睇埋運氣，當然仲有演技啦！
第二個跑出嘅係老豆，佢個傷好得七七八八，公司叫佢返去做嘢，係喎，唔記得老豆實際上唔係失業，條友只係工傷，不過之前屋企個氣氛係人人冇嘢撈，唔怪得老豆買卡拉ok返嚟都面不改容啦！
我同阿哥一直以嚟都keep住send CV，老母就講咗唔再做嘢，費事受氣寧願喺屋企抖下，但我內心其實好清楚一定要快過阿哥搵到工，點解？因為老豆同細佬已經有工返喇，再落後就得返老母同我喺屋企，佢又煩又容易躁，得兩母子朝夕相對肯定好大鑊，所以我創出咗一項個人紀錄，就係一個星期內send出87份CV，同時亦打破埋87份CV都冇回音嘅紀錄……
不幸嘅事終於發生，阿哥以後上姿態爬頭，佢有份工見一次就請咗，仲要隔日就可以返工，再強調一下，我嗰87份CV唔係有得in但冇回音，係全部冇feedback，你老味見都冇得見呀！曾經一度以為個email壞咗，部電話short咗，又唔係吖，啲詐騙同sell嘢嘅電郵電話日日有㗎喎！
果然不出所料，得返兩母子共處一室嗰陣，老母日日喺度哦：「點㗎你！又唔出去搵嘢做，係咪諗住一世留喺屋企呀？」「你睇下，細佬咁懶都生性喇，你呢？」「你求其搵份送貨又好，便利店又好，保安又好，咩都做住先啦！」
雖然明白老人家係咁，不過真係好煩，我又唔係冇盡力，結果咪多咗同老母嘈囉！
後來我直頭要出去連鎖咖啡店搵工，怕L咗我老母，但係呢種有家歸不得嘅日子維持咗兩個星期啫，我老母居然有工返，係之前個清潔阿頭搵返佢，聽講唔夠人用喎，老母見自己喺屋企百無聊賴，所以答應重操故業，而我就變咗全家唯一一個失業嘅人。
而家office hour一個人霸晒成間屋係咪好爽？其實唔係，因為我已經由2023年2月開始失業，而家係2023年11月，仲有個半月就2024年，冇收入當然係一個問題，自信跌到落谷底呢下先至難頂。
全家失業原來未算慘，當佢哋一個二個重投職場，喧鬧過後得返我一個繼續搵工，嗰種感覺更加淒涼，聽講年尾好少空缺，有都肯定係豬頭骨，又聽講農曆新年前後比較少人辭職，因為個個等花紅雙糧，或者我真係要考慮下搵份便利店或者保安。(完)