我唔同意冇嘢做就等於係廢青，因為搵唔到工有好多客觀因素，例如市道同埋際遇，大把人勤勤力力都會失業，同時亦有好多人冇料扮四條仍然高薪厚職，不過我屋企個細佬仲衰過以上兩種人。
唔係想唱衰佢，而係細佬已經畢業兩年，但始終唔肯做嘢，原因係佢睇唔起啲工，完全冇經驗又一味嫌人工低，一年前有份Lab見成咗，不過佢話$13,000唔係人做，後來又聲稱有間marketing公司請佢，然後話咩$15,000狗也不屌。
我想強調佢畢業後從未正式做過嘢，full-time經驗係零，咁你出嚟社會當然係由junior起步㗎啦，點知細佬話唔係junior定senior嘅問題，係人工嘅問題。
「Fresh grad你想要咩人工呢？」
細佬：「起碼五、六萬啦！」
「五、六萬？你家姐我出嚟做咗五年嘢都冇呢個價，點解你覺得自己完全冇工作經驗會值呢個人工？」
細佬：「你做五年嘢都冇呢個人工係你廢啫！」
以上係真實對話，然後細佬拎住部電話，開咗個討論區畀我睇：「你睇，好多人都話自己啱啱畢業已經搵緊五、六萬，唔係我作㗎，好多人都咁講。」
「好多人？呢啲係咩人？」
細佬：「網民囉！咩人咩人！」
「你連啲網民真身係邊個都唔知，佢講你就信？」
細佬：「唔係淨係一個forum啲人咁講，開多個畀你睇，嗱！呢個post新鮮滾熱辣，人哋話美國啲fresh grad一出嚟已經有六萬，係香港啲公司咁低賤。」
我都費事同佢講，呢個forum同嗰個forum有分別咩？咪又係唔知乜頭乜路嘅網民，呢班口口聲聲話自己fresh grad已經搵緊五、六萬嘅人，現實生活中可能同我細佬一樣，根本就失業咗好耐，日日喺屋企量地。
唔係武斷，我唔排除有啲人一畢業就搵五、六萬，但佢要咁樣計，咪即係話畀你聽踢波一定可以好似C朗同美斯咁搵好多錢，唔成功嗰啲球員你唔講？喺美國畢業但搵唔到嘢做嗰啲人你唔講？大學畢業出嚟搵雞碎咁多嗰啲例子你又唔講？
細佬話喺香港做廉價勞工好失敗，或者係啦，但佢個個月攤大手板問阿爸阿媽攞錢，比起人哋做廉價勞工更失敗，呢個係我嘅觀點。
上forum，勿認真，一啲冇根據冇實證嘅留言都當做金科玉律，真係非常之可笑，我作為家姐勸又勸過，嘈又嘈過，佢唔聽仲要挖苦我係廉價同失敗，咁仲有咩好講？唯有祝佢早日搵到一份有五、六萬月薪嘅工啦！
投稿讀者：家姐