由於細佬即將移居日本，佢擔心去到當地唔容易搵人維修水電，加上經查證後已知日本同類型服務收費會較香港貴，所以我就陪細佬一齊Join咗個家居維修DIY 班，其實呢個course都係由讀者介紹，真係要講聲感激！
再強調一次，非廣告，我係真金白銀畀咗$2560（兩位），所以當中不涉宣傳，純粹係上完堂嘅真實感受分享。
據了解呢個家居維修課程經常會full，每次學生數量應該係40至60人咁上下，臨場會分幾組，半日上理論，半日落手落腳做。正如主辦機構上堂前嘅提示一樣，盡量唔好著咁靚，因為肯定會成身灰塵，甚至掂到油漆灰水。
咪以為學家居維修就一定係全男班，我當日目測男女比例大約六四之比，有好多女仔嚟學，都話港女正㗎啦！
唔知係好定唔好，我嗰組被編排先上理論堂，lunch返嚟就落場實踐。理論嘅時候我差啲瞓著，紙上談兵幾粒鐘實在太悶喇，而且課堂啲櫈真係唔舒服，坐我後面幾個同學仔都有同感，不過要讚一讚導師好畀心機講課，配合ppt輔助，講得十分清晰，而且有問必答。奉勸要上堂嘅朋友仔前一晚早啲瞓，否則會幾難捱，假設當日我係先上實踐堂，lunch返嚟再上理論堂，我估自己會毫不猶豫中途偷走。
喺聶瞳Facebook page裡面提到「平安夜屋企爆屎渠，call師父上門被開價18000」，呢個真人真事就係當日導師提供。
課堂上係有做cross-selling，導師一路講解之餘，仲會一路介紹佢哋有咩產品可以買，從幾百蚊至過千蚊嘅各式電鑽組合又有，油掃同埋防水膠又有，細至幾十蚊嘅清潔劑都有，果然識做生意！ppt講完個電鑽就即刻話畀你知幾錢，填表課金就可以落堂拎走，某程度上係幾方便，不過大家絕對唔使擔心，導師同埋職員並唔會hard sell，有興趣買就填表，lunch後先交表格比職員，冇人會mon實你有冇買，亦冇人會強迫你消費。
對於呢種cross-selling，我作為初哥係受落嘅，甚至認為係必須，試問學員點記得晒啲電鑽型號吖，自己出去買隨時搞錯，睇完導師示範先買就包冇死，何況買唔買都冇壓力，了解多啲冇壞。我個人會傾向mark好晒先，返屋企再上佢哋嘅online store買，達到指定金額有得送貨，好過上完堂拎個電鑽周街走，你估好輕咩！
捱完半日理論，另外半日落手落腳試玩就會醒神好多，雖然得半日時間又教你鑽牆，又教你鑽雲石，又教你批灰補油，又教你換鎖……等等，係有啲急趕同埋片面，但係導師仍然會畀足時間各學員親手嘗試，例如我最冇興趣學嘅駁電，要記啲咩火線、中線、水線，真係煩到想skip咗佢，不過你實習完之後，就會發覺冇想像中咁難同埋乏味，每試一樣嘢，你都好有滿足感。
當日理論係一個導師負責，實習時就換過兩個唔同嘅阿sir，唔知係我好彩定係整體職員質素都高，前後3個導師比我嘅印象都好有耐性，好有禮貌，唔明講到你明，非常盡責。
喺呢度報名上堂仲可以加入群組，平時遇到咩維修問題可以掟出嚟，大家一齊交流同解答，感覺相當唔錯，我純粹從學員角度出發，平均$1280一位，如果平少少會感覺抵啲，但必須留意學咗呢堆基本知識之後，唔使話次次用得著，人生遇上幾次屋企有小問題要維修，自己搞得掂就已經慳返晒㗎喇，唔使下下call人上嚟整，唔使次次食海鮮價，唔使人哋整咗乜都唔知，淨係咁都應該唔止慳咗$1280。
以前我住嗰間屋，師父上嚟鑽兩個窿裝廁紙架收500蚊，最後仲要斜晒好似藝術品咁樣，嗰個畫面我真係唔想再記起。