唔少航空業界嘅朋友雖然一早收到風會裁員，不過正確嘅日子竟然要透過新聞先知，有時行開行埋冇跟到啲報道，仲要靠親朋戚友轉告最新消息，試問點會唔心淡？
政府嘅保就業計劃未能夠對症下藥，老闆藉此拎到資助，而員工就變成用完即棄嘅工具，當公司袋袋平安，過埋唔炒人嘅保證期，再眼見冇新一輪嘅保就業措施，老闆就立即砍掉舊員工，請返一班平價嘅新人返嚟頂替。
好多人會問：「遲早都飛返㗎啦，而家炒晒啲人，下年咪又要請過。」就以空中服務員為例，唔同年份入職，底薪嘅等級都有所不同，部分人底薪係萬七八，部分人就萬三四，再新入職嘅員工可以唔超過一萬。公司收完保就業嘅資助，將舊人清走，正常飛返之前就請啲幾千蚊底薪嘅新人，咁就慳得最多，賺到最盡。
其實唔止航空業，坊間有唔少公司亦一樣視員工為用完即棄嘅工具。朋友公司做電子，得十幾個人，而佢嘅職位係跟單，有個已離職嘅舊同事WhatsApp佢：「你辭咗工咩？」
朋友答：「冇呀，做咩咁問？」
已離職舊同事原來喺招聘網站見到呢間公司出job ad，因為得十幾個人，加上office又細，嗰個position如果唔係有人走，根本就唔會再加人。慢慢地，佢老闆再出多幾個job ad，當中所請嘅幾個職位，原本做緊嗰幾位同事全部都未走，所以佢哋當時已經心裡有數，後來不出所料，保就業承諾唔炒人嘅限期一過，包括我朋友在內嘅幾位員工通通被裁，取而代之嘅係一班萬鬆啲人工嘅新人。
睇到公司出job ad先知自己即將被炒，感覺真係好不安。
我以前做過一份工喺大埔工業村，成幢building都係佢哋，員工自然唔會少，大家返工首先要喺地下大堂拍卡入閘，放工亦一樣要拍卡離開。佢哋炒人嘅方式非常「特別」，因為怕被炒嘅員工會喺last day搞事，所以永遠都不動聲色，department head知道亦唔會講，當同事放工拍卡離開，而部閘機又冇反應，咁即係代表自己已經被炒。
當時我哋一班同事成日講笑：「一陣放工隨時出唔到閘㗎。」意思就係可能已經畀人炒咗。
喺度要強調少少嘢，市況唔好，經濟低迷，公司採取唔同措施去開源節流係無可厚非，裁員絕對係冇人想見到嘅結局，但係告知同埋告別嘅方式可唔可以人道少少？可唔可以畀返應有嘅尊重呢？員工有心理準備，唔止情緒上可以消化，仲可以利用時間幫自己規劃一下，最後走都走得冇咁多怨言。好聚好散，真係咁難咩？