有冇見過一個人走，成個department冧檔嘅情況？
今日係1月2號，一個月前嘅今日，會計部阿姐辭咗職去另一間公司，佢係個不折不扣嘅大好人，好到會覺得佢根本唔係Team Head，月頭月尾做payroll得佢一個OT，班細嘅同佢講嘢永遠都串串貢，仲要三日唔埋兩日就請假，留低好多手尾畀佢跟，如果你嚟我公司做，肯定會搞錯邊個係大邊個係細。
有次一齊加班，我都忍唔住講咗句：「好少見Team Head咁冇架子。」
佢話：「做嘢最緊要開心嘛。」
親民係好，只係職場上好多人欺善怕惡，你敬人一尺，對方就踩到上心口，不過點都好啦，佢而家有更好發展就足夠喇，我間公司配唔起佢。
班細嘅終於意識到阿姐平時係單天保至尊，可惜太遲喇，payroll不等人，搞唔掂隨時全間公司遲出糧，然後你會聽到會計部班人拍keyboard、掟計數機，收線之後自言自語：「啲友仔真係好麻煩架喎，成日請假，有啲請半日，有啲又冇submit假紙，好亂呀！」
冷靜啲吖！講到請假，你哋先係專家，平時一個月請假嘅次數，係其他team半年嘅總和呀！
結果佢哋要打畀阿姐請教，呢個時候終於知道咩叫做客氣同禮貌喇，難為對方轉咗工都要幫手，呢位Team Head實在太善良。
每間公司都有呢兩類人，一種係冇料扮四條仲要聲大大，另一種就係高手在民間，好聲好氣唔係冇料到，只係唔鍾意無風起浪。
PS：偷偷哋話你哋知，呢單真人真事本身用咗嚟寫廣告，阿客話唔夠戲劇性，其實呢度唔係賣天馬行空，係賣咬地，如果要作故事，大把作家寫得好過聶瞳，幸好阿客都理解大家要求唔同，廣告最終和平解約，唉屌！2019一出閘就撻Q，不過有共識並唔係壞事，唔啱風格無謂夾硬出。
如果你哋都見過一個人走，成個department冧檔嘅故事，留言分享下啦！等我抄低啲橋做下隻廣告。
＝＝＝＝＝＝＝＝＝＝
IG : officedailyhk
(今日ig個讀者投稿幾高質，請半日假見工撞正舊同事，唔請都算，仲要畀佢教訓一餐。）