廣告賽後感
今日嘅牙膏廣告，好多謝阿客採納真實故事，喺度分享下呢單經歷。
請人唔要top up degree係真有其事，當時我個客請vp，其實為我同直屬上司帶嚟一定困擾，我哋一齊負責呢個job，咁樣搵人會好limit。
坦白講，好似vp呢類position，要有返咁上下經驗，年紀一定唔輕，當年唔係直接讀上去大學唔代表佢哋廢，可能係受到環境影響，例如生活條件冇咁好，我身邊都有朋友因為要供細佬妹讀書，自己出嚟打工先，等屋企人出晒身，跟住就去進修讀返個degree。
就算唔係錢銀問題，出咗嚟做嘢先覺得education方面唔夠，即刻走去日頭返工夜晚讀書，咁又有咩問題呢？從另一個角度睇，我反而欣賞嗰份毅力，大佬呀！返工已經好辛苦，夜晚讀書你估容易架？返到屋企真係人都散晒，單單係呢種不屈不撓嘅精神已經要加分啦！咁都要嫌？
好多人send cv出去但冇回音，可能份工背後有啲潛規則係我哋唔知，你以為fit晒份jd，原來仲有細節係畀對方嫌棄緊。
當時個vp位好難請，直接問個hr點解唔要top up degree人，佢答老細唔鍾意喎，喂我問點解呀？你都冇答我問題！同我問人點解想轉工，佢答我因為想辭職有咩分別？
咁係咪top up degree唔吃香就唔讀？我覺得唔應該為一個爛蘋果而質疑進修嘅意義，未必一定講degree，你去讀下英文、日文、西班牙文，甚至去學結他都值得鼓勵。所有證書只不過係一張紙，可能喺某啲場合會成為入場劵，但自己學到嘅嘢先係最重要，當你做落咗一份工，有冇料自然會有人睇到，實戰先可以見真章。
你識多一樣嘢，第日就求少人一樣嘢，呢個先係去學習任何新事物嘅終極意義。