公司上上下下都好忙，唔係忙工作，而係忙搬嘢，因為老細搵咗人上嚟office睇風水，仲信到十足十。
老細沾沾自喜咁講：「好多名人都睇佢㗎！你哋真係有眼不識泰山，我個生意partner同佢熟先可以打尖咋，普通人book呢個風水師至少要等半年至一年，同埋佢收好貴㗎！」
我：「幾錢呀？兩萬睇一次？」
老細：「兩萬？梗係唔得啦！」
Admin小姐：「五萬呀？」
老細：「總之就天價啦！我兩年前睇過㗎喇，真係有少少肉赤，但係聽完風水師講又的確好順，疫情期間都撐得住。」神神祕祕死都唔肯講幾多錢。
原來老細之前已經睇過呢位風水師，不過當時只係睇家宅，今次就有啲唔同，睇完家宅睇埋公司，擺咗兩嚿唔知咩石喺窗口，又指示reception旁邊要放盆栽，套路來來去去都係嗰啲啦，最大影響反而係風水師話老細房今年唔聚財，如果可以坐出嚟會好啲喎，老細認為睇得就要信，何況仲畀咗咁多錢，結果佢真係搬出嚟坐，間房打算吉咗喺度。
Admin：「各位同事，下星期一就要執位喇，你哋鍾意順移又得，自己再調又得，總之星期五收工前搞掂，Samuel你張枱執乾淨啲喎，特別係櫃桶，老細之後坐你個位㗎！」
Samuel：「麻鬼煩！冇嘢搵嘢嚟搞！」其實Samuel平時做嘢已經充滿怨氣，更何況佢擺咗好多私人雜物喺自己張枱，唔發牢騷就假。
另一位同事Joey：「又要駁過晒啲電腦，唉！我哋呢兩行坐滿人啱啱好，咁咪有一個人要坐影印機旁邊個單丁位囉。」
個個都唔肯坐去嗰個孤島，仲話要猜包剪揼決定，小學生咩，不過我都唔想坐。
Zoe：「其實有個方法好簡單，老細坐Samuel個位吖嘛，咁Samuel搬去孤島咪得囉，全部人唔使郁。」
Samuel：「痴線，我唔搬去嗰度呀，睬你都傻！」
我：「唔制呀！咁老細咪即係坐我隔籬，好大壓力㗎！我寧願猜包剪揼！」
Yvonne：「我都唔制，老細坐Samuel個位即係坐我後面，乜都睇實晒！」
大家傾緊解決方案嘅時候，老細喺房裡面大喝一聲：「Samuel！點解個quotation唔啱㗎？」
Samuel聽到老細把聲嬲嬲地，嚇到三魂唔見七魄，即刻衝入老細房唔知係解釋定係照肺，成20分鐘都未出嚟，其實我等緊佢print份嘢畀我㗎，順豐哥哥仲要上咗嚟收件，唯有自己去Samuel部腦度print啦！
郁一郁Samuel個mouse，喺佢螢幕見到某討論區，死仔吖，搞掂就print出嚟啦，掛住喺度上forum，我仲見到佢開post打咗成段字，差在未撳個發佈掣……咦喂，我見到一句「Office班賤女人勁仆街，想孤立我！」
吓，老細要調位咋喎，做咩話我哋係賤女人呀？大家討論啫，邊有孤立你呀？
Receptionist：「喂，順豐哥哥走咗喇，佢趕時間，晏啲先上嚟收你份件。」
我：「哦，好吖！」
既然速遞走咗，我亦費事自己print喇，Samuel過咗成粒鐘都未出返嚟，佢個mon太耐冇掂，又變返黑畫面，不過我愈諗愈嬲，有咩得罪你要咁樣講嘢呢？點解要話我哋係賤女人！
放工後我同男朋友提呢件事，佢反而笑到飛起，仲話打工仔喺現實生活中受咁多氣，上討論區發洩好正常喎，又提議開嗰個forum睇下有冇人回應，結果見到班網民好多不負責任嘅留言：
「係啦！女人係咁賤，我office嗰班都係臭雞！」
「一巴星落去叫啲女收聲啦！」
「你公司D女咩年紀先？如果後生又靚女，今晚約出嚟九龍塘收服佢哋啦！」
「佢哋係咪想坐你大髀咋！」
「肯定係痴女，仲要係好淫嗰隻，欲求不滿呀ching！你就飽啦！」
我愈睇愈火，男朋友就睇得好開心。
我：「仲笑！唔睇喇！個個唔知頭唔知路就畀意見，講埋啲嘢又咁侮辱。」
男朋友：「嘩，呢啲好小兒科咋喎，算斯文㗎喇。」
我：「咁都叫斯文？」
男朋友：「咪住先，你知唔知個forum有起底功能㗎，即係可以睇到你同事出過咩post！」
我：「好喎！我想知佢仲鬧過我哋啲乜。」
將個post拉返上去，跟住撳佢username隔籬個「起底」掣，真係名都改得衰過人，Samuel個username叫做「兩團肉加一汁毛毛」……佢平時雖然好重怨氣，但外表都算斯文，點解咁大反差？
意料之內嘅係，「兩團肉加一汁毛毛」出咗好多post鬧老細鬧公司鬧同事，全部都係講到自己氹仔浸蛟龍呀、虎落平陽被犬欺呀、喺度做嘢大材小用呀，總之人人都係廢嘅，得佢係最叻咁啦！
我：「真係好笑，平時最多甩漏係Samuel，老細今日先捉佢入房照肺。」
男朋友：「所以咪要發洩囉，嘩屌……」
我：「做咩？」
男朋友：「兩團肉加一汁毛毛之前出過個post，話隔籬位女同事著黑絲好淫，好想瘋狂奶佢腳趾喎！你坐佢隔籬，即係講緊你呀？」
我：「係咪變態㗎！畀我睇下！」
男朋友：「仲有仲有，之前又話有一次落雨，你除咗高踭鞋換拖鞋，聞到你隻腳好臭，不過都好想奶下。」
我已經撳唔住怒火，而且覺得好嘔心，不過男朋友再補充：「冷靜，唔止話你㗎，佢有post講過reception姐姐鬼影變幻球，個胸時大時細，另外話Admin條女戴眼鏡好似AV女優，想捉佢入廁所就地正法……」
夠喇！我唔想再聽！
第二日我著咗條長褲返工，冇咩必要都唔會着短裙同埋黑絲，然後Samuel望住我講早晨，一見到佢個樣我就諗起個username……兩團肉加一汁毛毛。
呢個時候，男朋友無端端WhatsApp我：「喂，原來兩團肉加一汁毛毛噚晚好夜出咗個新post，我而家都有啲嬲！」
又講咩賤嘢呀……
（未完待續）