男友喺WhatsApp話畀我知，「兩團肉加一汁毛毛」噚晚深夜發文，Topic係「懷疑女同事條仔性無能，佢坐隔籬日日姣我。」唔怪得男友咁大反應啦，但嬲嗰個人應該係我先啱喎！
好奇心驅使之下，我不斷發掘Samuel嘅舊post，講公事佔咗30%，例如有一個「仆街同事唔換水，老奉叫我幫手。」其實真相根本唔係咁，Samuel先係冇水會行開嗰個，佢寧願攞住個吉杯返埋位，都要等其他人換水先再斟。
另外30%就係FF post，例如想奶人腳趾、想捉住女同事就地正法、樓下女保安望住我嘅眼神好淫、公司有幾條女同一時間鍾意我……仲有40%係甜故，不得不佩服佢呢啲post竟然有咁多like，其中一隻故事係講「出trip唔覺意搞咗女同事，絶倫の上司」，呢兩年疫情，去邊度出trip呢請問？你又幾時做咗上司呢？
佢另一隻甜故都好多like，叫咩「搵ptgf撞正女同事，中出完第二日扮冇事」，如無意外，呢位兼職ptgf嘅女同事應該係我啦係咪？完全冇諗過Samuel係咁有才華，大作家即係大作家，唔知佢幾時會出書呢？我一定買返嚟畀「兩團肉加一汁毛毛」親筆簽名。
再睇返「懷疑女同事條仔性無能，佢坐隔籬日日姣我，點算好？」個post，終於見到一個正義留言，有個叫做「鮑魚脹卜卜」嘅網友寸「兩團肉加一汁毛毛」：「死毒L，咪咁多幻想啦！女同事條仔勁過你10倍唔通又同你講，人哋唔係姣你，係當你傻仔咋！」
我即刻WhatsApp男朋友：「喂，你睇下，個forum有正常人㗎！」
男友：「我嚟㗎！嬲得滯借咗個friend嘅account鬧佢！」
原來我男友就係「鮑魚脹卜卜」。
除咗男友之外，我只係同家姐姐夫分享呢件事，並冇同任何同事講，費事引起恐慌啦，加上Samuel不過係FF啫，雖然我而家對佢好避忌，但「兩團肉加一汁毛毛」係上討論區匿名先會咁wild，平時唔敢做啲乜嘅。
姐夫聽完就咁講：「其實男人係有好多幻想，通常分幾個階段，細細個會諗啲女明星，大個咗知道完全冇可能，就會開始諗身邊嘅人，例如女同事、女朋友啲friend……」
都未講完，家姐已經搭嘴：「咁你有冇諗過我啲朋友？」
然後佢兩公婆就開始鬧交，唔可以再討論落去，希望姐夫冇諗過佢老婆個妹啦！
公司調位嘅大限將至，各人討論緊邊個調去荒島嘅時候，我第一個舉手：「唔使爭，我坐過去。」同事們好驚訝，但我唔方便解釋，亦唔想解釋，你哋邊個想坐Samuel前後左右就自便啦，我淨係想消失喺佢視線範圍內啫，麻煩以後啲女主角用Zoe、Yvonne、Admin姐姐，再唔係就鬼影變幻球個receptionist啦，我唔想畀人奶腳趾同埋中出呀唔該！
但係有邊個估到，喺我調完去荒島之後一日，大作家「兩團肉加一汁毛毛」又出咗個新post，Topic係：「女同事想做我SP，我狠狠拒絕，佢嬲到調位坐。」
我決定以後唔再追Samuel啲post喇，突然諗起姐夫話男人有好多幻想，所以我走咗去「鮑魚脹卜卜」個username度撳起底，嗯……文筆仲好過「兩團肉加一汁毛毛」，不過男友話係借個friend嘅account吖嘛，兩個人一齊最緊要信任，咁唯有選擇相信啦，或者咁樣我會開心啲嘅。
（完）