好憎啲辦公室政治，咪以為做細嘅可以置身事外，有時啲大嘅玩權力鬥爭，隨時都會被捲埋入去。
我大佬（即係我上司）不嬲同另一位高層長期角力，兩條友爭功勞爭資源咩都爭一餐，勢成水火已經一段日子，但係半年前嗰位高層得勢，迫走咗我大佬，以為件事就咁完啦，點知大佬走咗冇幾耐就去另一間公司做，仲call晒成班同事出嚟，叫我哋跟埋佢過檔。
老實講，同大佬嘅關係雖然唔算差，但又未去到「誓死相隨」嘅境界，我打份工㗎咋，唯一想轉工嘅理由就係怕咗辦公室政治，不過我大佬咪就係其中一個辦公室政治嘅始作俑者囉，如果跟住跳槽，以佢嘅性格隨時又喺新公司做相同嘅嘢，咁我跟埋去做乜？
最重要嘅係，佢叫我哋過檔嘅Offer係人工平手，本來喺九龍區，而家要過海，唔好玩啦，我未至於要追隨舊上司搞到自己日日搭車過海啩，重點係待遇照舊喎！
我大佬話畀大家自己決定，結果大部分同事咪又係留低，得兩個跟佢跳槽，唔理得人咁多啦，呢啲嘢人各有志，嗰兩位同事的確係同我大佬特別熟嘅，某程度上都理解。
只係幾個月後事情有巨大轉變，當日同我大佬不和嗰位高層舉家移居倫敦（佢老婆係英國人），勢估唔到老細會叫我大佬回巢，聽講仲有人工加，我大佬答應食回頭草，一個屈尾十就返嚟做，不過當初跟佢走嗰兩位同事就慘喇，因為佢兩個走咗之後，公司已經請咗人頂替，反而係我大佬個position未請到人（之前由同佢不和個高層兼任），老細應該唔想煩，又覺得做生不如做熟，所以直接邀請大佬返嚟做！
大佬隻身回巢，漏低跟佢過檔嘅兩個同事喺嗰間新公司，佢兩個即刻聯絡我哋班舊同事求救，點救啫？唔通炒人騰返兩個位出嚟咩！我大佬過咗海就神仙，冇理佢哋嘅生死，當初跟佢辭職真係笨柒喇，咁就變咗孤兒仔。
比悲傷更悲傷的事係，嗰間新公司因為我大佬做咗一陣就走，視嗰兩位跟佢加盟嘅同事為餘孽，結果喺試用期完結前放棄佢哋，換言之新公司唔要佢哋，舊公司又冇接收返佢哋，兩頭唔到岸，唔止係孤兒仔，直情變埋失業仔。
其實都擔心過當日冇跟佢跳槽，我大佬會懷恨在心㗎，不過佢又冇喎，食回頭草不知食得幾開心，亦冇任何安排同部署幫嗰兩位舊部返嚟，正宗用完即棄，其中一個比較好彩，啱啱搵到新工，而另一個就仍然待業中，年尾流流你叫人點算吖！
經過呢件事之後，我體會到職場冇永遠嘅敵人，更加冇永遠嘅朋友，辦公室政治唔好牽涉其中，即使麻煩都係要搵上門，盡量避得就避啦，否則只會成為別人嘅棋子或者籌碼，顧掂自己先係最重要。
我大佬返咗嚟之後好開心呀，咁梗係啦，之前同佢鬥生鬥死嗰個高層走咗喎，而家日日心情都勁靚，根本唔記得當初跟佢過檔嗰兩位同事喇，人哋之前為咗追隨你先走，轉個頭你就由得人自生自滅，真係自私到一個點。
呢個大佬都係跟唔過㗎喇，可惜年尾冇乜好工，我有家庭唔可以裸辭，唯有暫時頂住先，希望下年年頭有機會走啦！