有日一位先生嚟到診所。
佢行埋嚟登記處拉低自己個口罩擘大口，指住個口講：「啊」
做咩啫你？
我：「先生麻煩你戴返好個口罩先」
佢：「啊，你睇吓我呀」
我：「你戴返個口罩先，我睇冇用嘅，要俾醫生睇，我淨係可以同你登記，你再入房俾醫生睇嘅」
佢繼續唔肯戴返個口罩，繼續指住自己個口。
點呀，係咪要睇牙呀？我哋西醫嚟呀！
我：「先生你戴返個口罩先啦，我都講咗我睇係冇用嘅，要入房俾醫生睇嘅」
佢終於有啲反應，拉返高少少個口罩，真係高少少咁大把，露出上唇咁戴，厲害。
佢問：「我入面應該生咗嘢唔舒服呀」
我：「你俾身分證我登記呀，我同你登咗記先」
佢：「登記呀？」
我點頭，佢終於俾我打動到拎出身分證。
我登記完俾返身分證佢：「先生你可以坐低等等先，一陣醫生會嗌你入房嘅，你聽到你名就可以入去啦」
佢：「入去前我要唔要有咩準備呀？」
嗯…入去前要準備行入去？
我：「你可以諗吓自己係有咩唔舒服，一陣入去講俾醫生知」
佢：「你唔駛幫我麻醉嘅？」
麻咩醉呢？
我：「吓？你係嚟睇醫生咋喎，我哋呢度冇麻醉喎」
佢：「我頭先同你講咗我入面生咗嘢唔舒服呀嘛」
我：「係呀，我咪講咗一陣入房同醫生講囉？」
佢：「唔駛幫我麻醉咩？」
我：「麻醉喎？做手術嗰啲喎？」
佢：「係呀，我入面生咗嘢呀嘛，唔落麻醉就咁切咪好痛囉？」
…我可唔可以唔再應你呀？
我：「我哋係普通診所嚟，冇呢啲手術做呀，醫生係會了解咗你情況先，如果有需要嘅話醫生係會轉介你去專科」
佢：「你俾返張身分證我呀！」
我：「頭先已經俾返你，睇住你袋咗落銀包，你搵吓有冇…」
佢：「攝返落我銀包又唔出聲！我唔係嚟拎轉介信㗎囉！」
佢轉身離開診所。
張身分證係你自己袋返落銀包，唔係我攝落你度…你個籮柚有啲大，我好難幫你攝到落去。
👉🏻即睇其他診所低能奇觀嘅文章
👉🏻《診所低能奇觀》 「你都冇正面答過我問題」
https://hkofficedaily.com/?p=18068
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。