最近轉工，聽落好瀟灑，其實猶豫咗好耐，之前份工做咗6年半，期間試過幾次畀獵頭approach，但始終冇走，因為好驚離開comfort zone，好怕轉變，擔心唔適應，即使知道舊公司冇前景又成日OT，我仍然唔肯踏出呢一步，寧願賺少啲求個安穩，通常做一份工太長時間嘅人都有呢種通病。
上個月有一晚OT，我見磨下磨下已經夜晚9點半，餐廳而家收10點肯定閂晒門，但又唔想買返屋企先食，結果把心一橫叫外賣喺office食埋先走。一路食一路煲劇，搞呢搞路11點離開公司，上咗巴士冇幾耐就瞓著，仲黑仔到瞓過龍去到總站先落車。
想坐返倒頭車，點知尾班車時間已過，渾渾噩噩咁行返出大路call車，跟住見到有個阿婆企喺路邊巴士站，個樣又顯得不知所措，反正架Uber未到，我就問下阿婆有冇嘢幫到佢。
原來阿婆係等緊我頭先坐嗰架巴士，所以我就同佢講尾班車時間已過，唔好再等，另外提議佢搭小巴，不過阿婆話搭巴士有長者優惠，搭小巴冇，而佢身上又得幾蚊。我當時冇諗得咁複雜，何況架小巴都係10蚊左右，不如畀錢阿婆搭啦，點知佢死都唔肯要我啲錢，仲話自己慢慢行返屋企就得。
其實行路根本唔得，咁遠點行呀？後生仔都辛苦啦，何況佢咁大年紀又駝晒背。正正喺呢個時候，我架Uber到咗，問一問阿婆屋企喺邊頭，知道順路之後就叫佢同我一齊上Uber，而佢係唔知咩叫Uber，純粹見到私家車唔使入錢，所以先答應上車。
要讚一讚Uber司機好好人，輸入行程時只有一站，但我講完個情況之後，Uber司機完全唔介意停多一站順路放低阿婆，最好笑係阿婆喺車上面仲讚我叻仔，因為有司機車我出出入入，哈，畀錢㗎婆婆，而且呢位唔係我專屬司機，咁當然啦，我並冇解釋太多，最緊要佢唔使行路返屋企啫。
阿婆落車先過我，原來佢一路手握住個五蚊銀，臨尾係都要塞畀我先安樂，我話唔使，Uber司機都幫口叫婆婆袋返啲錢，但阿婆好硬頸唔想欠人，因為都糾纏得幾尷尬，為咗件事快啲解決，我最後收咗呢個五蚊銀。
轉幾個街口我都落車喇，返到屋企沖涼再將啲衫褲丟去洗衣籃，慣性摷一摷袋裡面有冇嘢，伸手一摸就係頭先婆婆嗰個五蚊銀，突然間好想知佢返到屋企休息未，諗諗下又有啲難過，社會上有部分人嘅生活真係好艱難，如果我頭先唔係瞓到過晒站，又或者當時冇問佢有咩可以幫忙，婆婆而家仲會唔會喺路邊等一架唔會嚟嘅巴士呢？還是佢會三更半夜徒步行返屋企？
其實呢件事發生嘅前幾日，有Headhunt介紹咗份工畀我，視像見過一round，second in就請咗半日假去見，呢間係大公司，由reception行入去office已經見到好多人，我太習慣本身嘅環境喇，習慣到唔想改變，所以一如過往，當headhunt話對方落實畀offer，我例牌答：「想考慮多陣」，但遇到婆婆之後，我嘗試改變心態，豁出去accept新offer，主要原因當然係晉升前景好咗，人工亦都多咗。
可能婆婆真實中唔係我諗到咁無助，或者佢有幾層樓揸手都唔定，不過當晚見到佢冇長者優惠就寧願行路，呢一幕的確inspire咗我，趁住當打之年，我應該做多啲，賺多啲，睇多啲，令未來嘅自己少一分無力感。
新工返咗幾日，暫時適應中，希望一切順利。