有日一位先生嚟到診所。
登記順利，順利請佢入醫生房見醫生。
佢出到嚟之後，拎藥時，我同佢講：「呢度三日藥嘅，呢隻係每日…」
佢：「你拎張假紙嚟先」
我遞上病假紙：「我同你講埋啲藥點食先呀」
佢雙眼望住張病假紙講：「唔駛啦，嚟嚟去去咪又係呢啲嗰啲」
哦，明嘅明嘅，識DO識DO。
我：「好，咁我將啲藥放落袋，你返到去食嘅時候記得睇清楚點食」
佢：「會食先算啦」
OKOK，理解理解。
我：「總之你要食嗰時就睇清楚啦，呢度三百二十蚊呀」
佢：「咪住先，張病假寫兩日咋喎」
我：「係呀，醫生係寫今日同聽日俾你休息」
佢：「藥就三日，假紙就兩日？個價五折呀？」
點樣計到係五折？
我：「幾多日藥唔代表你有幾多日病假，醫生係會因應返你嘅情況而開病假俾你，如果到時你到第三日都係唔舒服嘅就要再返嚟」
佢：「咩呀咩呀，我完全聽唔明你講咩喎」
係咪又要學嗰招『我唔知我唔理我聽唔到亦都見唔到呀？』，好OUT喎。
我：「醫生係開兩日病假嘅，你有需要就再返嚟覆診啦」
佢：「姑娘，你知唔知你最缺嘅係啲咩呀？」
我秒回：「應該係錢？」
佢：「係我呢啲優質病人呀」
係鬼呀你，收皮啦。
我：「我哋診所冇分優唔優質，係有需要就要嚟睇醫生啫」
佢：「你嗌醫生寫多日俾我呀，我呢啲優質病人實返轉頭㗎」
我：「我可以幫你問醫生，你等等」
我入到房問醫生，答案就梗係唔得啦，我再返出去見阿優質病人啦。
我：「唔好意思先生，醫生的確係寫兩日病假俾你，你有需要就再返嚟覆診啦」
佢：「係咪搞錯啲咩呀？我喎？我嗰張喎」
不如你自己入去問醫生啦，我放返你入去。
我：「一係我俾你再入房同醫生傾呀」
佢耍手：「咪啦咪啦，容咩易兩日都冇埋㗎」
你又幾清醒喎。
佢再講：「我睇埋今次就算㗎啦，你轉頭取消我紀錄啦，幾錢呀」
我：「三百二十」
成功收錢，病人離開診所，病歷照KEEP。
===
👉🏻《診所低能奇觀》 同男朋友沖涼😨
https://hkofficedaily.com/?p=17474
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。