因為出席已離職同事嘅farewell飯局，阿頭竟然叫有份去嘅人自己遞信resign。
其實呢個farewell飯局完全冇牽涉任何商業機密或者利益往來，純粹係有人離職，同事之間出嚟食個飯，相信每間公司同埋每一個人都試過，就係咁簡單同埋普通。
呢位同事辭職嗰陣，阿頭即刻反轉豬肚，咁嘅情況其實唔係第一次發生，完全唔明白佢諗乜，下屬有更好發展唔應該戥人高興咩？點解辭職就要當下屬係殺父仇人呢？心理變態㗎？
當人係殺父仇人都算，最麻煩係會叫其他同事一齊玩杯葛，但我哋點解要聽你支笛呢？點解要一齊做小學雞？何況呢位同事人緣不嬲好好，所以嗰餐farewell飯都有唔少人出席，要分兩枱坐，當然都有個別同事驚死冇去，我唔知驚乜，打份工啫，私人時間同邊個食飯都要畀阿頭管？人身自由嚟喎！
我哋阿頭覺得下屬resign就係背叛公司，辜負佢嘅栽培，阿頭真係喺我哋面前咁樣講，依照呢個邏輯，香港每個打工仔都曾經背叛公司啦係咪？唔通佢自己喺公司做咗十幾年，就要求人人嘅軌跡一樣？
由於我哋食farewell飯嗰陣有影相，唔知邊個畀咗幅相阿頭睇，佢小器到喺公事WhatsApp group度send返出嚟，再公然喺個group同我哋講：「出席飯局嘅同事，唔該自動自覺遞辭職信。」
我哋阿頭真係叫所有出席farewell飯局嘅同事自行辭職，當中有兩個係隔籬department嘅人就唔使理，阿頭主要針對返佢自己team嘅下屬。
有同事想揪出幕後黑手，想知係邊個出賣我哋將幅相外洩，但事到如今捉鬼又有咩用？唔排除係有同事post上social media，再畀公司唔知邊個cap圖都未定，既然事情已經發生咗，再諗呢個問題係冇意思，何況件事根本唔合理，限制我哋同辭職同事farewell已經夠晒幼稚，而家仲要出席飯局嘅人自己resign？
我可以辭職，因為跟住呢種阿頭係冇運行，留低都會畀你玩殘㗎啦，但我就一定告你，唔會就咁算數，好在有幾個同事共同進退。
唔係要聯群結黨搞咩對抗，而係細心諗下，返一份工連同邊個食飯都冇自由，咁做嚟做咩？我哋每個同事都會有辭職嘅一日，今日屈服咗，將來都要承受相同嘅惡果。最令人氣頂嘅係，我哋有搵過老細講呢件事，但係老細叫我哋自己內部拆掂，你話係咪心灰意冷？
同組幾個同事都遞晒信，但有一個好唔爭氣，竟然走去求阿頭唔好炒，我明白家家有本難念的經，唔係個個都可以無後顧之憂劈炮唔撈，所以我哋唔勉強呢位同事跟隊，只係覺得阿頭因為一件咁唔合理嘅事要你走，倒轉頭仲要低聲下氣求佢，咁樣過得到自己嗰關咩？
工就辭咗，呢單嘢排期搞緊，進化到要搵咩調解員插手嘅階段，無論如何我都會據理力爭，食餐farewell飯都接受唔到，粗暴地要出席飯局嘅人自行辭職，咁都要卑躬屈膝以後點做落去？你話我硬頸又好咩都好，呢單嘢一定要奉陪到底。
投稿：Luk
✉️ 講開辭職，記得要有Email留底免爭拗。
《上司丟埋一邊冇畀HR，堅持要員工做多兩星期》
https://hkofficedaily.com/?p=14097