有日一位小姐嚟到診所。
佢行埋嚟登記處問我：「姑娘我咁樣係咪俾我男朋友搞成咁呀？」
我：「我同你登記先呀，有咩唔舒服同醫生講就可以啦」
佢堅持問：「咁係咪我男朋友搞成我咁呀？」
我：「你一陣入去問醫生呀，我唔係醫生答唔到你呀」
佢：「我早幾日都好哋哋，係同佢一齊沖完涼就咁啦」
我唔想聽你哋鴛鴦戲水嘅事呀。
我：「一陣入去同醫生講呀，你俾身分證我先呀」
佢：「肯定係我男朋友搞成咁呀！」
我要身分證呀！我唔係要知你有男朋友呀！
我冇出聲，佢繼續講：「邊有人沖涼會屙尿呀？你話係咪啦姑娘？」
下次佢同你一齊沖涼嗰陣屙屎再話我知啦。
我都冇出聲。
佢繼續講：「搞成咁一定係因為佢屙尿落嚟！」
你挑起咗我嘅好奇心了。
我：「你有邊度唔舒服呀？不如你俾咗身分證我先呀」
佢：「尿灼傷呀，一定係呀」
你去沖涼定去浸尿浴呀？你男朋友篤尿屙到成個浴缸咁多呀？
我：「咁呀…你俾身分證我先啦」
佢終於放低身分證喺枱面，我開心拎起登記。
佢：「你話係咪我男朋友搞成咁啦？」
唔知呢，我負責登記咋嘛，其他嘢交俾醫生得啦～
佢再問：「我咁樣有冇得醫呀？」
我：「醫生先答到你幫到你，你等等呀」
佢好心急：「我而家先嚟睇會唔會太遲呀？」
我：「你等等呀，好快到你睇啦」
佢：「啲菌會唔會一直咁走上腦呀？」
你好明顯已經上晒腦啦。
我：「你唔駛咁驚咁緊張嘅，等醫生睇咗你先啦」
佢：「我下面有隻甲已經灰灰黃黃咁啦，係咪嗰隻腳趾已經冇血到呀？係咪我男朋友啲尿灼到我隻腳咁呀？」
…睇嚟唔關篤尿事。
===
👉🏻即睇其他診所低能奇觀嘅文章
👉🏻《診所低能奇觀》 媽媽與BB
https://hkofficedaily.com/?p=16791
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。