《燈神 1》同事$500買對家 一星期贏$9000

星期日凌晨睇緊英格蘭足總盃決賽，由車路士對李斯特城爭冠軍，同時間我亦喺度打緊稿，電話msg提示聲忽然響咗好多下，本身又睇波又打字真心唔想理，但係啲msg似乎愈嚟愈熱鬧，當時其實已經係凌晨一點幾。

打開msg睇，原來係舊同事個group，阿恆講咗句：「啱啱先返到屋企，原來有波睇，買20蚊車路士，睇得刺激啲，順便支持下聶瞳愛隊。」

由於呢個係group chat，阿恆表示自己投注咗20蚊車路士之後，我認真數過，一共有8位同事回覆佢，內容分別係：

「收到！」
「多謝恆恆！你是最好的❤️」
「阿恆！！！終於等到你買波喇！」
「即刻過數去投注戶口先。」
「好在你單聲咋，開波前買咗車仔，而家買返李斯特城double！」
「唔使講嘢，瞓身李斯特城。」
「恆哥，聽日lunch我請！阿恆不紅，天理不容！」
「我愛你阿恆，香港始終有你！」

成班舊同事收到「指引」之後，全部買晒李斯特城即場Win，當時係下半場，比數依然係0:0，作為一個由學識睇波已經鍾意車路士嘅忠實車迷，我知道呢埸波已經係馬騮玩賓周——玩撚猿（完），本能打咗句msg：「屌你咩阿恆！」

不過仲未撳得切掣send出去，李斯特城中場球員泰利文斯就射入一球世界波，下半場63分鐘，車路士落後0:1，冇喇冇喇，李斯特城喺阿恆「欽點」下已篤定成為足總盃冠軍，結果呢個比數亦維持到尾，車路士以一球飲恨。

阿恆喺個group度講：「噢，輸咗20蚊，沖涼瞓覺，goodnight！」

我：「阿恆你唔去死？」

佢覆返我幾個哈哈笑emoji，不過成班舊同事就當阿恆神咁拜，其中一個仲話聽日要請佢食餐好，因為佢上星期入咗$500落馬會，keep住買阿恆對家，一星期內贏咗$9000幾。

其實呢位舊同事只係買咗5場波，500變900，拎900再買，變1700，1700再買，變3000幾，用晒呢3000幾再買，變5000幾，最後晒冷5000幾買多場，埋單連本帶利贏咗9000蚊左右，歷時只係一個星期。

阿恆臨瞓前仲特意提呢位舊同事：「得些好意須回手，呢9000蚊要拎返出嚟喇，十賭九輸，見好就收，我係呢個星期得閒啲先買幾場波咋，下星期開始忙，短期內唔買㗎喇！！」

舊同事：「過返錢去銀行戶口啦，9000蚊夠㗎喇！多謝阿恆！」

成班人害死我隊車路士之後，拍下屁股就鳥獸散。其實阿恆以前一場波閒閒地買幾千，甚至過萬，佢唔賭馬，唔會過大海賭錢，淨係賭波，因為阿恆本身係好鍾意足球，佢以前賭波輸錢成日講一句自嘲：「我由細到大都當足球係朋友，但足球就一次又一次呃我。」

我當年識阿恆嗰陣，佢有個好靚嘅老婆同埋一個好可愛嘅仔，家住奧海城浪澄灣，但接觸咗外圍之後，佢愈賭愈狼，愈賭愈大，短短幾年間睇住阿恆妻離子散 ，連層樓都冇埋……

講個小秘密畀你哋知，《辦公室日報》個facebook page由一開始就唔接任何財務公司嘅植入式廣告，直至而家都仲堅持緊，其實係同阿恆有關。（未完待續）

（註：網站廣告係由google派，我控制唔到，但fb植入式廣告係要經我同意，故此從來唔會做財務公司嘅post）

＝＝＝＝＝
⚽ 📞 講起買波，記唔記得呢個電話投注post？
https://hkofficedaily.com/?p=12603